ADNA-nın 90 illiyinə həsr olunmuş beynəlxalq elmi konfrans

Noyabrın 22-dən 25-dək Azərbaycan Dövlət Neft Akademiyasında bu ali təhsil ocağının 90 illik yubileyinə həsr olunmuş "Neft-qaz, neft emalı və neft-kimya" mövzusunda beynəlxalq elmi konfrans keçirilib. Konfransda ölkəmizin müxtəlif təhsil və elm ocaqlarının nümayəndələri ilə yanaşı Rusiya, Ukrayna, Türkiyə, Qazaxıstan, Rumıniya, Ekvador və Çin Xalq Respublikasından gəlmiş alim və mütəxəssislər iştirak edirdilər.

Elmi konfransın noyabrın 22-də keçirilən plenar iclasını təşkilat komitəsinin sədri, ADNA-nın rektoru, akademik Siyavuş Qarayev açaraq qonaqları və nümayəndələri salamladı, forumun işində onlara uğurlar arzuladı.

Rektor S.Qarayev Azərbaycan Respublikasının Prezidenti cənab İlham Əliyevin ADNA-nın 90 illik yubileyinin keçirilməsi, habelə yubiley münasibəti ilə akademiyanın 66 əməkdaşının dövlətimizin ən yüksək mükafatları və fəxri adları ilə təltif edilməsi barədə imzaladığı sərəncamları ölkə rəhbərliyinin bu ali məktəbə və ümumiyyətlə, təhsil sisteminə göstərdiyi diqqət və qayğı kimi qiymətləndirdiklərini söylədi. Hər bir konfransın müəyyən bir müddət ərzində görülmüş elmi işlərin nəticəsi haqqında hesabat olduğunu vurğulayan rektor yubiley konfransının da bu baxımdan əldə olunmuş elmi nailiyyətlərin nümayişinə həsr olunduğunu dedi və əmin olduğunu bildirdi ki, konfrans yeni əlaqələr qurmaq, informasiya mübadiləsi üçün imkan yaradacaq, dinamik inkişaf yolunda olan Azərbaycanın dünya iqtisadi sistemində rolu və yeri haqqında təəssüratlar formalaşdıracaqdır.

Sonra təbrik üçün söz Azərbaycan Respublikasının təhsil naziri Misir Mərdanova verildi. Təbrik çıxışına konfrans iştirakçılarını və qonaqları salamlamaqla başlayan təhsil naziri çox böyük bir bayrama toplaşdıqlarını qeyd edib ADNA-nın 90 illiyini Azərbaycan tarixinin ən böyük yubileylərinin biri kimi qiymətləndirdi. Yubiley ərəfəsində ADNA-nın bir qrup əməkdaşı tərəfindən bu ali təhsil ocağının zəngin tarixini özündə əks etdirən çox mükəmməl bir kitab hazırlandığını diqqətə çatdıran nazir həmin kitabın çap olunmasında əməyi olanlara minnətdarlığını bildirdi.

Təhsil naziri ölkə Prezidentinin ADNA-nın 90 illik yubileyinin keçirilməsi ilə bağlı sərəncamına əsasən yubilyar təhsil ocağında ciddi quruculuq, abadlıq və təmir işləri aparıldığını qeyd edərək Prezidentin bir neçə gün öncə imzaladığı sərəncamlarla akademiyanın çoxsaylı professor və müəllimlərinə fəxri adların, mükafatların verilməsini ölkə başçısının bu mötəbər elm və təhsil müəssisəsinə qayğısının nəticəsi kimi dəyərləndirdi, öz adından və akademiyanın kollektivi adından Azərbaycan dövlətinin başçısına minnətdarlığını bildirdi.

Nazir çıxışının sonunda yubiley münasibətilə akademiyanın kollektivini, təltif olunanları bir daha təbrik edib, onlara cansağlığı və fəaliyyətlərində daha böyük uğurlar arzuladı.

Plenar iclasda ADNA-nın Geoloji kəşfiyyat fakültəsinin 1956-cı il məzunu, AMEA Geologiya İnstitutunun direktoru, akademik Akif Əlizadə, Kimya-texnologiya fakültəsinin 1980-ci il məzunu, Azərbaycan Dövlət Neft Şirkətinin vitse-prezidenti David Məmmədov, Almaniyanın Köln Tətbiqi Elmlər Universitetinin professoru Reza Talebi-Daryani və başqaları çıxış edərək yubiley münasibəti ilə akademiyanın kollektivini təbrik etdilər, akademiyanın ölkəmizdə, habelə bir sıra xarici dövlətlərdə neft-kimya sənayesinin inkişafındakı rolundan, burada aparılan yüksək səviyyəli tədris-təlim işlərindən, elmi axtarışlardan, akademiyanın xarici ölkələrin ali məktəbləri ilə səmərəli əməkdaşlıq əlaqələrindən söz açdılar.

Plenar iclasdan sonra elmi konfrans öz işini bölmələrdə davam etdirdi. 4 gün ərzində 7 bölmə üzrə 250-dən çox məruzə dinlənilərək müzakirə olundu. Konfrans noyabrın 25-də öz işini başa çatdırdı.

Yusif ƏLİYEV

Azərbaycan müəllimi.- 2010.- 26 noyabr.- S.6.