"Ali təhsildə elektron tədris"

mövzusunda seminar

Noyabrın 22-də Azərbaycan Dillər Universitetində "Ali təhsildə elektron tədris" mövzusunda seminar keçirildi. Seminarda ali təhsil müəssisələrinin nümayəndələri ilə yanaşı, ABŞ-ın Edinboro Universitetinin professorları Hemiş Makloud və Çarlz Anderson iştirak edirdilər.

Tədbirdə çıxış edən ADU-nun rektoru, professor Səməd Seyidov bildirdi ki, Azərbaycanda çox vacib olan beynəlxalq konfrans öz işinə başlayır. Bu konfrans təhsil və texnologiya vasitələri və iqtisadi inkişafla bağlı olan bir konfransdır. Hazırda ADU-da informasiya və kommunikasiya texnologiyaları vasitələrindən xeyli vaxtdır lazımınca istifadə edirik. Azərbaycan Respublikasının Prezidenti İlham Əliyevin diqqəti və qayğısı sayəsində universitetdə "İnformasiya Resurs Kompleksi" yaradılmışdır. Kompleks Azərbaycanda analoqu olmayan imkanlara malikdir.

Sonra ABŞ-ın Edinboro Universitetinin professoru, doktor Hemiş Makloud çalışdığı təhsil ocağında İKT fəaliyyətindən və ondan təhsil sahəsində istifadə etmə qaydalarından söz açdı. O, çıxışında öyrətmə, öyrənmə və qiymətləndirmə proseslərində əsas tendensiya xarakterini doğuracaq yeniliklər, kitabxana resurslarının rəqəmsal formata çevrilməsi, virtual öyrənmə mühiti və elektron portallardan ətraflı danışdı.

Seminar diskussiya şəklində başa çatdı.

Şakir CƏFƏROV

Azərbaycan müəllimi.- 2010.- 26 noyabr.- S.9.