VI Uluslararası folklor konfransı

2003-cü ildən 2007-ci ilədək Bakıda "Ortaq Türk keçmişindən ortaq Türk gələcəyinə" Uluslararası folklor konfransı keçirilmişdi. İkiillik fasilədən sonra bu mötəbər tədbir yenidən 25 noyabrda Bakıda öz işinə başlayıb. İkigünlük konfrans Azərbaycan Milli Elmlər Akademiyası Folklor İnstitutu ilə KKTC Doğu Akdeniz Universitetinin birgə tədbiridir.

"Ortaq Türk keçmişindən ortaq Türk gələcəyinə" VI Uluslararası folklor konfransı Azərbaycan MEA-nın Rəyasət Heyətinin iclas salonunda başlayıb. "Türk epik ənənəsində dastan" məsələsinə həsr olunmuş elmi məclisdə türk xalqlarının folklorunu və folklorşünaslığın aktual problemlərini tədqiq edən Azərbaycan alimləri və dünyanın müxtəlif məkanlarında araşdırma aparan mütəxəssislər iştirak edirlər.

Tədbir iştirakçıları Türkiyə, Şimali Kipr Türk Respublikası, Qazaxıstan, İran, Rusiya, Türkmənistan, Gürcüstan və Ukraynadan gəlmiş tədqiqatçıların dəyərli məruzə və çıxışlarını maraqla qarşılayıblar.

Azərbaycan Milli Elmlər Akademiyası Folklor İnstitutunun mətbuat xidmətinin məlumatına görə, problematikası ilə elmi ictimaiyyətin diqqətini cəlb etmiş konfransa elm adamları, KİV nümayəndələri ilə yanaşı, müxtəlif ölkələrin Azərbaycandakı diplomatik nümayəndəliklərinin əməkdaşları da qatılmışlar.

Azərbaycan müəllimi.- 2010.- 26 noyabr.- S.9.