Səmimi insan, səriştəli
təhsil işçisi
Bu yaxınlarda
Azərbaycan Dövlət
Rəssamlıq Akademiyasının
tərbiyə işləri
üzrə prorektoru, iqtisad
elmləri namizədi,
dosent Həmid Ənvər oğlu Zeynalovun 70 yaşı tamam oldu. Həmid Ənvər oğlu Zeynalov 1940-cı il
sentyabrın 25-də Azərbaycanın
qədim şəhərlərindən
biri olan Dərbənddə dünyaya
göz açmışdır.
Həmid müəllim
1957-ci ildə yeddiillik
məktəbi, 1959-cu ildə
fəhlə-gənclər axşam
məktəbini, 1961-ci ildə
isə Bakı Sovet Ticarəti Texnikumunu bitirmişdir.
H.Zeynalov 1961-1968-ci illərdə Bakı Ticarət Kulinariya Peşə Məktəbində təlimatçı və direktor müavini vəzifəsində çalışmışdır. 1967-ci ildə Azərbaycan Xalq Təsərrüfatı İnstitutunu bitirib iqtisadçı ixtisasına yiyələnmişdir. O, 1968-1974-cü illərdə ümumittifaq ticarətin konyunkturası və əhalinin istehlak mallarına olan tələbatını öyrənən elmi-tədqiqat institutunun Azərbaycan filialında baş elmi işçi və şöbə müdiri vəzifələrində işləmişdir.
Həmid müəllimin təşkilatçılıq
qabiliyyəti nəzərə
alınaraq o, 1974-cü ildə
Bakı Sovet Ticarəti Texnikumunun direktoru vəzifəsinə
təyin olunmuşdur. 1981-ci ildə
o, Dövlət Ticarət
və İstehlak Kooperasiyası İşçiləri
Həmkarlar İttifaqı
Azərbaycan Respublika Komitəsinin sədri seçilmiş, 1983-cü ildə
Turizm və Ekskursiya Azərbaycan Respublika Şurasının
sədri təyin edilmişdir.
Həmid müəllim
müxtəlif vəzifələrdə
işləməklə yanaşı,
elmi-pedaqoji fəaliyyətini
də davam etdirmiş, 1989-cu
ilin mayında Moskva Sovet Ticarəti
Qiyabi İnstitutunun elmi şurasında dissertasiya müdafiə edərək iqtisad elmləri namizədi alimlik dərəcəsini
almışdır.
1989-1993-cü illərdə Həmid müəllim Azərbaycan
Respublikası Nazirlər
Kabinetinin Ticarət və məişət xidməti şöbəsində
aparıcı mütəxəssis,
referent vəzifələrində çalışmışdır.
1993-cü ildə Azərbaycan
Respublikası Təhsil
Nazirliyinə işə
qəbul edilən H.Zeynalov on altı il İqtisadiyyat
idarəsinin (şöbəsinin)
müdiri vəzifəsində
işləmişdir.
Azərbaycan Respublikası Prezidentinin müvafiq sərəncamı
ilə H.Zeynalov 2005-ci
ildə Azərbaycan təhsilinin inkişafında
xidmətlərinə görə
"Tərəqqi" medalı
ilə təltif edilmişdir.
Həmid müəllim 2009-cu ilin oktyabrından Azərbaycan
Dövlət Rəssamlıq
Akademiyasında tərbiyə
işləri üzrə
prorektor vəzifəsində
çalışır, elmi-pedaqoji
fəaliyyətini davam
etdirir.
H.Zeynalov eyni zamanda yaxşı
ictimaiyyətçidir. O, 1994-cü ildən
"Dərbənd" xeyriyyə
cəmiyyətinin sədridir.
Həmid müəllim gözəl
ailə başçısıdır,
bir oğlu, iki qızı, dörd nəvəsi vardır. Övladlarından biri elmlər
doktoru, ikisi isə fəlsəfə doktorudur.
Həmid müəllimə möhkəm
cansağlığı, ailə
səadəti arzu edir, elmi-pedaqoji fəaliyyətində uğurlar
diləyirik.
Arif MURADOV,
Nəcəf NƏCƏFOV
Azərbaycan
müəllimi.- 2010.- 26 noyabr.- S.18.