İnformasiya texnologiyalarının

tətbiqinə həsr olunmuş "dəyirmi masa"

Kişinyov şəhərində Avropa Birliyinin təhsildə informasiya texnologiyalarının tətbiqinə həsr olunmuş "dəyirmi masa" keçirilib.

"Dəyirmi masa"da "eTwininq platforması: məktəblər üçün birlik", "eTwininq: XXI əsrin pedaqogikası", "Müəllimlərin eTwininq çərçivəsində peşəkar inkişafı", "İnternet - təhlükəsizlik" və s. mövzular geniş müzakirə olunub. "2008-2012-ci illərdə Azərbaycan Respublikasında təhsil sisteminin informasiyalaşdırılması üzrə Dövlət Proqramı" çərçivəsində ölkəmizi bu tədbirdə Təhsil Nazirliyinin Təhsil Sisteminin İnformasiyalaşdırılması İdarəsinin treninq və monitorinq şöbəsinin müdiri Ramil Süleymanov, Bakı Avropa Liseyinin direktor müavini Rəhilə Əliyarzadə, Rabitə və İnformasiya Texnologiyaları Nazirliyinin İnformasiya cəmiyyətinin inkişafı şöbəsinin baş məsləhətçisi Etibar Umudov təmsil ediblər.

Proqram Avropa ölkələrinin məktəbləri üçün vahid bir İnternet-platformada ünsiyyət qurmaq üçün planlaşdırılıb. Proqram çərçivəsində yaradılmış İnternet-portal vasitəsilə müxtəlif ölkələrin məktəbliləri ünsiyyət qurur, bir-birlərinə mədəniyyətləri, tarixləri və digər sahələri haqqında məlumat verə bilirlər. Proqram artıq 5 ildir ki, reallaşdırılır və bu müddət ərzində müxtəlif ölkələrin minlərlə müəllim və məktəblisi arasında virtual ünsiyyət yaranıb.

S.SƏFƏROVA

Azərbaycan müəllimi.- 2010.- 26 noyabr.- S.23.