Norveçin Azərbaycana yeni təyin olunmuş səfiri ADU-da

Oktyabrın 12-də Azərbaycan Dillər Universitetinin rektoru, millət vəkili, professor Səməd Seyidov Norveç Krallığının Azərbaycana yeni təyin olunmuş fövqəladə və səlahiyyətli səfiri Erlinq Şönsberqi qəbul edib.

Səfiri salamlayan Səməd Seyidov ADU ilə Norveç universitetləri arasında əlaqələrin mövcudluğundan söz açıb. "Bizim əlaqələrimiz uğurla həyata keçirilir və bu, digər layihələr baxımından da başqa universitetlərlə əlaqələrimizə bir nümunədir" - deyə o, bildirib.

Səfir Erlinq Şönsberq bu layihənin inkişafından məmnun olduğunu, tələbə mübadiləsinin mədəniyyətin inkişafına, həmçinin təhsil sahəsindəki əməkdaşlığa geniş rəvac verdiyini vurğulayıb. O, Oslo Universiteti ilə ADU arasında ikitərəfli əlaqələrin genişlənməsindən məmnunluğunu deyərək bu layihənin davamını dəstəklədiyini söyləyib.

Rektor Səməd Seyidov deyib ki, layihənin genişlənməsi bizim üçün əhəmiyyətlidir. O, bu ildən ADU-da Qafqazşünaslıq ixtisasının açıldığını, Amerika, İsrail, Koreya, Fransa, İtaliya, İndoneziya və digər mərkəzlərin yaradıldığını deyib. Bildirilib ki, bunların içərisində Skandinaviya Mərkəzinin xüsusi çəkisi var və Norveç dili və mədəniyyətinin öyrənilməsi vacibdir.

Sonra səfir ADU-dakı Skandinaviya Mərkəzində olub və Norveç dili öyrənən tələbələrlə görüşüb. Daha sonra o, ADU-nun İnformasiya Resurs Kompleksi ilə tanış olub.

Xatırladaq ki, bu il iyunun 26-dan avqustun 6-dək ADU-nun 9 nəfər müəllimi, 10 nəfər tələbəsi Norveçin Oslo Universitetində Beynəlxalq Yay Məktəbində iştirak edib. ADU-nun Skandinaviyaşünaslıq fakültəsində 37 nəfər tələbə təhsil alır. Adıçəkilən fakültədə 2 norveçli müəllim çalışır. ADU-da Skandinaviya Mərkəzi Azərbaycan Dillər Universiteti ilə Aqder və Oslo universitetləri arasındakı əməkdaşlıq nəticəsində 2007-ci il mayın 3-də açılıb.

Z.KAZIMOVA

Azərbaycan müəllimi.- 2010.- 15 oktyabr.- S.4.