Təhsil naziri Azərbaycan Universitetində olub

Ölkəmizin ilk özəl ali təhsil müəssisəsi olan Azərbaycan Universiteti 2010-2011-ci dərs ilinə yeni inşa olunmuş və ən müasir avadanlıqlarla təmin edilmiş binada başlayıb. Yeni bina, burada yaradılmış şəraitlə tanış olmaq, görülmüş işləri dəyərləndirmək məqsədi ilə Azərbaycan Respublikasının təhsil naziri cənab Misir Mərdanov oktyabrın 21-də Azərbaycan Universitetində oldu, tələbə və müəllimlərlə görüşdü. Universitetin rəhbərliyi, müəllim-tələbə heyəti tərəfindən səmimi qarşılanan təhsil naziri öncə ümummilli lider Heydər Əliyevin binanın foyesindəki büstü önünə gül dəstəsi qoyub xatirəsini ehtiramla yad etdi. Sonra universitetlə tanışlıq başlandı.

Nazir auditoriyaları, digər tədris-yardımçı otaqları gəzərək təhsilin keyfiyyətini, müəllim-tələbə fəaliyyətinin səmərəliliyini yüksəltmək üçün yaradılmış şəraitlə tanış oldu. Universitetin rektoru, AMEA-nın müxbir üzvü, professor Akif Musayev nazirə məlumat verdi ki, yeni bina müasir tələblərə tam cavab verir, ən yeni texnoloji avadanlıq universitetin tələbə və müəllimlərinin ixtiyarındadır. Burada hamının istifadə edə biləcəyi sürətli kabel İnternet şəbəkəsi və Wi-Fi sistemi mövcuddur. Bütün auditoriyalar və inzibati iş yerləri kompüterlərlə təmin olunub, auditoriyaların hər birində proyektor quraşdırılıb. 250 kompüter və 30 proyektor mühazirə və seminar məşğələlərinin müasir təlim texnologiyalarının tətbiqi ilə aparılmasına imkan yaradır. Auditoriyalarda super tədris imkanına malik "ağıllı lövhə"lərdən istifadə olunur.

Jurnalistika ixtisası üzrə kadr hazırlığı üçün nəzərdə tutulmuş Studiya-Media Mərkəzində tələbə-jurnalistlərin ən müasir tələblər səviyyəsində fəaliyyət göstərməsi üçün bütün şərait yaradılıb. Bu mərkəzdən, habelə konfrans zallarından istənilən televiziya kanalı, dünyanın hər hansı universiteti ilə canlı yayım reallaşdırıla, telekörpu qurula və ya distant təhsil təşkil edilə bilər.

İnformatika və dil dərslərinin keçilməsi üçün universitetdə 6 tam kompüterləşdirilmiş auditoriya var. Tələbə İnternet zalında eyni vaxtda 23 tələbə kompüter arxasında əyləşib tədris tapşırıqlarını hazırlaya və İnternetdən materiallar toplaya bilər.

Təhsil naziri auditoriyaları, konfrans və elmi şura zallarını, İnternet zalını, kitabxananı gəzib bütün bunlarla əyani şəkildə tanış oldu. Elmi şura zalında Şimali Kipr Türk Cümhuriyyətinin Yaxın Doğu Universiteti ilə canlı bağlantı yaradıldı.

Təhsil naziri I və III kurs tələbələrinin ingilis dili və tarix dərslərində olub tələbə və müəllimlərlə söhbət etdi, onlara öz tövsiyələrini verdi.

Universitetlə tanışlıqdan sonra nazir yeni binanın sonuncu - 7-ci mərtəbəsindəki akt zalında müəllim və tələbələrlə görüşdü. Onları salamlayan və yeni binaya köçmələri münasibəti ilə təbrik edən Misir Mərdanov universitetdə gördüklərindən çox məmnun qaldığını, görülmüş işlərin, yüksək səviyyəli təchizatın onu sevindirdiyini söylədi, bütün bunlara görə universitetin rektoruna, bu işdə əməyi olan hər kəsə təşəkkürünü bildirdi. Professor Akif Musayevin təşəbbüskarlığı, yüksək təşkilatçılıq bacarığı sayəsində son illər Azərbaycan Universitetində təhsilin təşkili, keyfiyyətinin yüksəldilməsi, digər ölkələrin ali məktəbləri ilə ikitərəfli əlaqələrin qurulması istiqamətlərində böyük işlər görüldüyünü, uğurlar qazanıldığını deyən nazir bütün bunların ölkə ictimaiyyəti arasında universitetin nüfuzunun artmasına gətirib çıxardığını vurğuladı. Bildirdi ki, bunu bu il universitetə qəbul olunmuş 300 tələbənin ötən illərdəkindən fərqli olaraq daha yüksək ballarla bu ali məktəbə gəlməsi də sübut edir.

Çıxışının sonunda universitetin yaxın gələcəkdə nəinki ölkəmizdə, hətta regionda ən yaxşı ali təhsil müəssisəsinə çevriləcəyinə əmin olduğunu söyləyən nazir, professor-müəllim heyətini aparılan inkişafyönümlü işlərdə rektora yaxından kömək göstərməyə çağırdı.

Yusif ƏLİYEV

Azərbaycan müəllimi.- 2010.- 22 oktyabr.- S.3.