Milli Qəhrəmanın təhsil aldığı məktəbdə görüş keçirilib

"Azərbaycan dünyası" beynəlxalq jurnalı və "Dədə Qorqud" Milli Fondunun əməkdaşları Azərbaycanın Milli Qəhrəmanı Mübariz İbrahimovun vaxtı ilə təhsil aldığı Biləsuvar rayonunun Əliabad kəndindəki tam orta məktəbdə olublar. Qonaqlar əvvəlcə Azərbaycanın Milli Qəhrəmanı Mübariz İbrahimova həsr olunmuş guşə önünə tər çiçək dəstələri düzdülər. Məktəbdə Mübarizə dərs demiş müəllimlərin xatirələrini dinlədilər. Görüşə gələnlər məktəb rəhbərliyinə və müəllimlərə belə vətənpərvər şagird tərbiyə edib yetişdirdiklərinə görə minnətdarlıq etdilər.

Sonra qonaqlar Mübarizin böyüyüb boya-başa çatdığı evə getdilər. Milli Qəhrəmanın ailə üzvləri ilə keçirilən bu görüşdə "Dədə Qorqud" Milli Fondunun prezidenti Eldar İsmayılov təsis etdikləri "Mehriban Ana" ordenini qəhrəmanın anası Şamama İbrahimovaya və Milli Qəhrəmanın layiq görüldüyü "Vətən övladı" ordenini qəhrəmanın atası Ağakərim İbrahimova təqdim etdi.

Tədbirdə Mübarizin atası və anası bu təltifə görə fondun bütün əməkdaşlarına minnətdarlıqlarını bildirdilər.

Mərasimdə Respublika Əsir və İtkin Düşmüş, Girov Götürülmüş Vətəndaşlarla əlaqədar Dövlət Komissiyasının nümayəndəsi A.Səfərov, "Dədə Qorqud" Milli Fondunun icraçı direktoru Z.Dadaşova, YAP Biləsuvar rayon təşkilatı Qadınlar Şurasının sədri X.Ağayeva, Mübarizin təhsil aldığı məktəbin müəllimi Ü.Qurbanova, Biləsuvar Olimpiya İdman Kompleksinin direktoru R.Məmmədov çıxış edərək qəhrəman barədə ürək sözlərini söylədilər, onun erməni işğalçılarına qarşı apardığı mübarizədən iftixar hissi ilə söhbət açdılar.

Sonda tədbirdə iştirak edən Biləsuvar rayon İcra Hakimiyyətinin başçısı Adil Məmmədov çıxış edərək Milli Qəhrəmanın hünər yollarından danışdı. "Dədə Qorqud" Milli Fondunun bütün əməkdaşlarına rayon ictimaiyyəti adından minnətdarlığını bildirdi.

***

Bakı şəhərindəki Tahir Həsənov adına 23 nömrəli orta məktəbin müəllim və şagird kollektivi Milli Qəhrəman Mübariz İbrahimovun təhsil aldığı məktəbin qonağı oldu. Onlar da Milli Qəhrəmanın həyatının müxtəlif anlarını əks etdirən guşəyə maraqla tamaşa etdilər. Sonra 23 nömrəli məktəbin direktoru İradə Rəhimli çıxış edərək Milli Qəhrəman Mübariz İbrahimovun görüşdə iştirak edən ata və anasına, məktəbin müəllim kollektivinə belə hünərvər bir oğul tərbiyə etdiklərinə görə minnətdarlıq etdi. Direktor sonra "Sən həmişə bizim qəlbimizdəsən", ulu öndər Heydər Əliyev haqqında yazılmış şeirlər kitablarını, məktəbləri haqqında çəkilmiş filmin diskini və bir çox əyani dərs vəsaitini məktəbə hədiyyə etdi.

Görüşün sonunda 23 nömrəli məktəbin şagirdlərinin hazırladığı "Vətən uğrunda ölən varsa, Vətən var" adlı film-kompozisiya nümayiş etdirildi.

Elə həmin gün görüş iştirakçıları Milli Qəhrəman Mübariz İbrahimovun vaxtı ilə yaşadığı evi də ziyarət etdilər.

Ədalət DAŞDƏMİRLİ

Azərbaycan müəllimi.- 2010.- 22 oktyabr.- S.7.