"Məktəbin fəaliyyətinin planlaşdırılması təcrübəsi"

Dünya təhsilinə inteqrasiya milli təhsilin elmi-nəzəri, elmi-pedaqoji əsaslarla idarə olunmasını tarixi bir tələb kimi qarşıya qoyur. Bu idarəolunma demokratikləşdirmə, humanitarlaşdırma, humanistləşdirmə... kimi prinsiplər əsasında, tarixi təcrübə və müasir dövrün tələbləri parametrlərində aparılmalıdır. Artıq Azərbaycan məktəblərində bu istiqamətdə müəyyən təcrübə qazanılmış, özünü doğruldan sistemlər formalaşmışdır.

Məktəbin idarə olunmasının bir çox aspektləri üzrə iş təcrübəsi formalaşmış tədris müəssisələri az deyil. Belə təlim-tərbiyə ocaqlarından biri İmişli rayonundakı Əliqulular kənd orta məktəbidir. Respublikanın əməkdar müəllimi Səxavət Tağıyevin (S.Tağlar) rəhbərlik etdiyi pedaqoji kollektivin uğurları, o cümlədən məktəbin idarə olunmasının aspektləri üzrə iş təcrübəsi İmişli RTŞ-ın Təhsilyanı Şurasında 2006, 2007-ci illərdə bəyənilərək rayonun ümumtəhsil məktəbləri arasında yayılmışdır.

Əməkdar müəllim, AJB-nin üzvü S.Tağıyevin 20 illik məktəb direktoru kimi fəaliyyəti dövründə tərtib etdiyi, zaman-zaman təkmilləşdirdiyi müxtəlif istiqamətli, məzmunlu planlar toplanaraq "Məktəbin fəaliyyətinin planlaşdırılması təcrübəsi" metodik vəsaiti şəklində nəşr olunmuşdur (Bakı: Araz, 2009, 92 s.).

Redaktoru Beynəlxalq Kadrlar Akademiyasının akademiki Ə.Əhməd, rəyçi Yazıçılar Birliyi Aran bölməsinin sədri S.Hüseynoğlu olan kitabda məktəbin, pedaqoji şuranın, fənn metodbirləşməsinin, sinif rəhbərləri metodbirləşməsinin, istedadlı uşaqlarla aparılacaq işlərin fəaliyyət planları toplanmışdır. Ümumilikdə 11 bölmədən ibarət metodik vəsait Azərbaycan Təhsil Problemləri İnstitutunun tövsiyəsi ilə İmişli və Beyləqan rayonları təhsil şöbələri metodkabinetlərinin şura iclaslarının müzakirəsindən sonra nəşr olunmuşdur.

İmişli RTŞ metodkabinetinin direktoru Sevdimalı Hüseynov və Beyləqan RTŞ metodkabinetinin direktoru Həsən Məmmədovun ön sözləri ilə buraxılmış vəsaitdə plan nümunələri ilə yanaşı, ayrı-ayrı mətbu orqanlarda verilmiş yazılar, məktəbin istedadlı şagirdlərinin qələm məhsulları, fənn olimpiadalarının qaliblərinin fotoları da əksini tapmışdır.

Qabaqcıl təcrübənin pedaqoji prosesdə faktor kimi rolu danılmazdır. Bu baxımdan metodik vəsaitdən istifadə edən məktəblərin uğurlarına təsiri olacağı şübhəsizdir.

Ş.ELNUR

Azərbaycan müəllimi.- 2010.- 3 sentyabr.- S.8.