Balaca Səma hamını heyrətləndirdi

Sentyabrın 15-də Bakıdakı 291 nömrəli "Araz" Ekologiya Liseyində "Bilik günü" münasibətilə təntənəli tədbir keçirildi. Dövlət himninin səslənməsi ilə başlayan tədbiri giriş sözü ilə liseyin direktoru Südabə Mikayılova açaraq müəllimləri, məktəbə ilk qədəm qoyan birinciləri və onların valideynlərini təbrik etdi. O, şagirdlərə həmişə dərslərini yaxşı oxumağı, müəllimlərinin tapşırıqlarına əməl etməyi tövsiyə etdi. S.Mikayılova liseyin uğurlarından danışaraq bildirdi ki, bu il 5 nəfər məzun 600-dən çox bal toplayaraq ölkənin nüfuzlu ali məktəblərinə qəbul olunub.

Çıxış edən müəllimlər və ötən ilin məzunları balaca fidanları təbrik etdilər. I "a" sinfinə qəbul olan balaca Səma Səfərli bağçada öyrəndiyi şeirlərlə tədbir iştirakçılarının diqqətini cəlb etdi. Yeni tədris ilinin ilk zəngi çalındıqdan sonra birincilər dərs keçəcəkləri otaqlarda yerləşdirildi. I "a" sinfində dərs deyəcək ibtidai sinif müəllimi Telli Süleymanovanın körpə fidanlarla ilk dərsi maraqlı keçdi.

Rəşad ZİYADOV

Azərbaycan müəllimi.- 2010.- 17 sentyabr.- S.5.