"Bilik günü" təhsil müəssisələrində qeyd olundu

 

Azərbaycan Texniki Universitetində 15 sentyabr - yeni dərs ilinin başlanmasına həsr olunmuş tədbir keçirildi. Mərasim iştirakçıları əvvəlcə universitetin birinci mərtəbəsində yerləşən ulu öndər Heydər Əliyevin büstü önünə tər qərənfil dəstələri düzdülər. Sonra bu təhsil ocağının həyətində başlanan tədbiri universitetin rektoru Havar Məmmədov açaraq qonaqları, müəllim və tələbələri "Bilik günü" - yeni dərs ilinin başlanması münasibəti ilə təbrik etdi. Qeyd edildi ki, universitetə 1715 yerə qarşı 1709 tələbə qəbul olunub. Bu, çox böyük uğurdur. Azərbaycan Texniki Universitetində 29 istiqamət, 75-dən çox ixtisas üzrə kadr hazırlığı aparılır. Universitetdə 80-ə yaxın professor, elmlər doktoru, 350-yə qədər elmlər namizədi, dosent çalışır. Bir neçə ildir ki, bu təhsil ocağı Boloniya prosesinə qoşulub. Ümumiyyətlə, tələbələrin təhsilində informasiya texnologiyalarından geniş istifadə olunur.

Bildiyiniz kimi, ölkə Prezidenti möhtərəm İlham Əliyev gənclərin təhsilinə, onların sosial şəraitinin yaxşılaşmasına xüsusi önəm verir. Ali və orta ixtisas bazaları genişləndirilir. Son illərə kimi 2000-dən çox yeni təhsil müəssisələri tikilib istifadəyə verilib. Bu, ölkə Prezidenti İlham Əliyevin və Heydər Əliyev Fondunun prezidenti, millət vəkili Mehriban Əliyevanın apardığı uğurlu işin nəticəsidir...

Sonra mərasimdə iştirak edən millət vəkilləri Gülər Əhmədova, Elton Məmmədov, Azərbaycan Respublikası rabitə və informasiya texnologiyaları nazirinin müavini İltimas Məmmədov, yüksək bal toplamış I kurs tələbəsi Nigar Əhmədova, valideyn Azər Əfəndiyev və IV kurs tələbəsi Araz Məmmədov çıxış edərək yeni dərs ili münasibəti ilə universitetin müəllim və tələbələrini təbrik etdilər.

Tədbirin sonunda yüksək bal toplayaraq universitetin müxtəlif fakültələrinin I kursuna qəbul olmuş gənclərə tələbə biletləri, qiymət kitabçaları və hədiyyələr təqdim olundu.

 

***

 

Ölkəmizin bütün ali, orta ixtisas və ümumtəhsil məktəblərində olduğu kimi, Lənkəran Dövlət Universitetində də yeni dərs ili - "Bilik günü" təntənə ilə qeyd edildi.

Universitetin rektoru, fizika-riyaziyyat elmləri doktoru, əməkdar elm xadimi, professor Asəf İsgəndərov yeni dərs ilinin başlanması münasibəti ilə magistr və tələbələri təbrik etdi. Bildirdi ki, yeni dərs ilində universitetdə 21 ixtisas üzrə 1500-dək tələbə təhsil alacaq. Bunun 355 nəfəri ilk dəfə auditoriyaya qədəm qoyur.

Universitetin dosenti, filologiya elmləri namizədi, Prezident təqaüdçüsü Hacı Mirhaşım Talışlı, universitet valideynlər şurasının sədri Sərhad Məmmədov, rayon Ağsaqqallar Şurasının sədri Kamal Kələntərli, valideynlər adından Alxan Şahverdiyev, Ədalət Həmidov çıxış edərək tələbələri təbrik etdilər, onlara elm və təhsil sahəsində uğurlar arzuladılar.

Tələbələr adından çıxış edən, 500-dən çox balla ali məktəbə daxil olmuş Nərmin Babazadə, Cəmilə Əliyeva və Günəş Bayramlı ürək sözlərini söyləyərək təhsildə və universitetin ictimai həyatında fəal iştirak edəcəklərinə söz verdilər.

Universitetə yüksək balla daxil olanların bir qrupuna tələbə bileti təqdim edildi.

 

***

 

Azərbaycan Dövlət Neft Akademiyasında bu il   yüksək bal toplayaraq adıçəkilən ali təhsil ocağına qəbul olunan 1-ci kurs tələbələri ilə görüş keçirildi. Görüşü Azərbaycan Dövlət Neft Akademiyasının rektoru Siyavuş Qarayev açaraq bütün tələbələri "Bilik günü" münasibəti ilə təbrik etdi, onlara müvəffəqiyyətlər arzuladı. Son illər ölkə təhsilinin uğurla inkişaf etdiyini, gənclərin təhsilə, elmə olan marağının artdığını söyləyən rektor 2010-2011-ci tədris ilində rəhbərlik etdiyi ali təhsil ocağına 1500-ə yaxın gəncin daxil olduğunu bildirdi. Qeyd etdi ki, ali məktəbə qəbul olunanlardan 84 nəfəri 600, 281 nəfəri isə 500-dən yuxarı bal toplayıb. S.Qarayev  yüksək nəticə göstərən həmin tələbələrin təhsil alacaqları illər ərzində də fərqlənəcəklərinə, nailiyyətləri ilə ali məktəbə başucalığı gətirəcəklərinə ümidvar olduğunu bildirdi. Görüşdə o da vurğulandı ki, Neft Akademiyasını bitirən məzunların işlə təmin edilməsi məqsədi ilə yeni layihələr hazırlanır. Artıq bir çox gənc bu il iş yeri ilə təmin edilib.

 Sonda gənclərə tələbə biletləri təqdim olundu.

 

***

 

Həmin gün Bakıdakı 35 nömrəli orta məktəbdə də təntənə ilə qeyd edildi. Dövlət himninin səslənməsi və bayrağın gətirilməsi ilə başlayan tədbiri giriş sözü ilə açan məktəbin direktoru Rəna Naibova müəllimləri, məktəbə ilk qədəm qoyan birinciləri və onların valideynlərini təbrik etdi. Onlara dərslərində uğurlar arzulayaraq bu gün təhsilə göstərilən dövlət qayğısından söz açdı.

Tədbirdə çıxış edən Bakı Şəhəri  üzrə  Təhsil İdarəsinin metodisti Sevinc Amanava əvvəlki illərlə müqayisədə bu gün şagirdlər üçün məktəblərdə  daha yaxşı  şərait yaradılmasından, şagirdlərin üzərinə düşən vəzifələrdən söhbət açdı.

Tədbir birincilərin ilk zənglə sinfə daxil olmalarıyla başa çatdı.

 

***

 

 Bakıdakı  42 nömrəli orta ümumtəhsil məktəbində keçirilən "Bilik günü" mərasimində ilk zəng çalındıqdan sonra Azərbaycanın  Dövlət bayrağı səhnəyə gətirildi və himnin sədaları altında  qaldırıldı. Tədbir başlanmazdan əvvəl ulu öndər Heydər Əliyevin və torpaqlarımızın azadlığı uğrunda  şəhid olmuş məktəbin məzunlarının əziz xatirələri bir dəqiqəlik sükutla  yad edildi. Təhsili millətin gələcəyi hesab edən ümummilli lider Heydər Əliyevin Azərbaycan dövlətçiliyinin möhkəmləndirilməsi yolunda sonsuz fədakarlığından danışan tədbirin aparıcıları məktəb kollektivi adından təhsil ocağının  yenidən qurulmasında, əsaslı təmir  olunmasında  əvəzsiz rolu olan Heydər Əliyev Fondunun prezidenti, Azərbaycanın birinci xanımı Mehriban xanım Əliyevaya  minnətdarlıqlarını bildirdilər.

Tədbirdə iştirak edən Nəsimi Rayon İcra Hakimiyyətinin başçısı Nəsib Məhəməliyev və Bakı Şəhəri üzrə Təhsil İdarəsinin müdir müavini Məhəbbət Qarabağlı  birinciləri təbrik etdi, onlara dərslərində uğurlar, müəllimlərə isə şərəfli peşələrində daha da ucalmağı  arzuladılar.

 

***

Bayram tədbiri Bakıdakı 57 nömrəli orta məktəbdə də geniş qeyd edildi. Yeni dərs ili məktəb kollektivi üçün ikiqat bayrama çevrilib.  Belə ki, bu il təhsil ocağı  Təhsil Nazirliyinin vəsaiti  hesabına əsaslı təmir olunaraq  istifadəyə verilib. Dövlət himninin səsləndirilməsi ilə başlanan tədbiri giriş sözü ilə açan məktəbin direktoru Aidə Əhmədova müəllimləri və birinciləri təbrik etdi, onlara gələcək həyatlarında uğurlar arzuladı.

Birinciləri  təbrik edən Nərimanov Rayon İcra Hakimiyyətinin başçısı Abdin Fərzəliyev onlara dərslərində yaxşı oxumağı, həmişə valideynlərinin, müəllimlərinin nəsihətlərini eşitməyi tövsiyə etdi.

Yeni Azərbaycan Partiyasının icra katibi, millət vəkili Əli Əhmədov da şagirdləri, müəllimləri və valideynləri  təbrik etdi. Ə.Əhmədov Azərbaycan dövlətinin elmə, təhsilə böyük diqqət və qayğısından danışaraq  ölkəmizin daha da qüdrətlənməsi üçün gənc nəslin savadlı olmasının vacibliyini vurğuladı. 

 Təhsilə göstərilən diqqət və qayğıdan danışan Bakı Şəhəri üzrə Təhsil İdarəsinin müdir müavini Hüseyn Əsgərov da birinciləri təbrik etdi, onlara dərslərindən həmişə əla qiymətlər almağı arzuladı.

Tədbir iştirakçıları məktəbin yenicə təmirdən çıxmış, müasir avadanlıqlarla təmin olunmuş binası  ilə tanış oldular. 

 

***

 

Bakıdakı 239 nömrəli məktəbdə "Bilik günü" unudulmaz xatirə ilə yadda qaldı.  Birincilər həyəcanla məktəbin həyətində idilər.  Məktəb rəhbərliyi adından qonaqlara "xoş gəldin" deyən tədbirin aparıcıları müəllimləri, birinciləri "Bilik günü"  münasibətilə təbrik etdi.   Onlara həmişə dərslərindən əla qiymətlər almağı, Azərbaycana layiq olmağı arzuladı. 

Çıxış edən qonaqlar  da müəllimləri, birinciləri və onların valideynlərini təbrik etdilər. Birincilər müxtəlif şeirlərlə, mahnılarla həmin günü unudulmaz xatirəyə çevirdilər. 

 

 

Azərbaycan müəllimi.- 2010.- 17 sentyabr.- S.4.