İtaliyalı alim Qərb Universitetinin qonağı olub

Sentyabrın 17-də Qərb Universitetində İtaliyanın Peruca Universitetinin rektoru, professor, xanım Stefani Giannini ilə görüş keçirildi.Görüşün məqsədi ikitərəfli əlaqələri inkişaf etdirmək, birgə seminarlar, dərslər, konfranslar keçirmək və elmi araşdırmaları genişləndirməkdir.

Qərb Universitetinin professoru Fikrət Sadıxov universitet barəsində qonaqlara məlumat verərək bildirdi ki, burada işgüzar inzibatçılıq, Qərb dilləri, kompüter elmləri və dizayn, siyasi elmlər fakültəsi fəaliyyət göstərir.Universitet 1991-ci ildən - fəaliyyətə başladığı vaxtdan indiyə kimi yüksəkixtisaslı mütəxəssislər hazırlamaq yönündə faydalı işlər görür. Bu işlər arasında elmi-praktik seminar və konfransların, Azərbaycanın və xarici ölkələrin tanınmış elm və siyasi xadimləri ilə görüşlərin keçirilməsi xüsusi yer tutur.

Sonra xanım Stefani Giannini görüşü təşkil edən Qərb Universitetinin rektorluğuna öz təşəkkürünü bildirdi və rəhbərlik etdiyi universitet barədə tədbir iştirakçılarına ətraflı məlumat verdi. Görüşdə İtaliyanın Azərbaycandakı fövqəladə və səlahiyyətli səfiri Mario Baldi də çıxış etdi.

Sonda qonaqlar Qərb Universitetinin müəllim və tələbələrini maraqlandıran suallara cavablar verdilər.

Şakir CƏFƏROV

Azərbaycan müəllimi.- 2010.- 24 sentyabr.- S.7.