Azərbaycan alimi A.S.Popov adına Odessa Milli Rabitə Akademiyasının fəxri doktoru seçilib

Bu günlərdə A.S.Popov adına Odessa Milli Rabitə Akademiyasının 90 illik yubileyinə həsr olunmuş "İnfokommunikasiya: İnkişaf problemləri və perspektivləri" mövzusunda Beynəlxalq elmi-praktik konfrans keçirilmişdir.

Tədbiri giriş sözü ilə akademiyanın rektoru, professor P.P.Vorobienko açmış və şad bir xəbəri konfrans iştirakçılarının nəzərinə çatdırmışdır: Azərbaycan Texniki Universitetinin rektoru, texnika elmləri doktoru, professor Havar Məmmədov A.S.Popov adına Odessa Milli Rabitə Akademiyası Elmi Şurasının 30 aprel tarixli qərarı ilə akademiyanın fəxri doktoru seçilmişdir. O, "Fəxri doktor" diplomunu və "A.S.Popov adına Odessa Milli Rabitə Akademiyasının 90 illik yubiley medalı"nı professor Havar Məmmədova təqdim etmiş, ona və konfransın bütün iştirakçılarına uğurlar arzulamışdır.

Üç gün davam etmiş konfransda iştirak edən Beynəlxalq Elektrik Rabitə İttifaqının prezidenti X.İ.Ture, Ukrayna nəqliyyat və rabitə nazirinin müavini, Dövlət Rabitə Administrasiyasının başçısı S.V.Krasnokutski, Monqolustan Dövlət Elm və Texnologiya Universitetinin rektoru, professor Bayanduren Damdinsuren, M.Tınışpayev adına Qazaxıstan Nəqliyyat və Kommunikasiya Akademiyasının prezident-rektoru, professor A.K.Botabekov, Moskva Rabitə və İnformatika Texniki Universitetinin rektoru, professor A.S.Ajemov, Beynəlxalq Elektrik Rabitə İttifaqının MDB ölkələri şöbəsinin rəhbəri Orozobek Kayıkov və başqaları professor Havar Məmmədovu təbrik etmiş və ona yeni-yeni uğurlar arzulamışlar.

Müşfiq BORÇALI

Azərbaycan müəllimi.- 2010.- 24 sentyabr.- S.2.