ADU-da 20 Yanvar şəhidi Ülvi Bünyadzadə anıldı
Azərbaycan Dillər Universitetində
sentyabrın 23-də 20 Yanvar şəhidi,
ADU-nun tələbəsi olmuş
Ülvi Bünyadzadənin anadan olmasının 41 illiyi münasibətilə
anım mərasimi keçirildi.
Mərasimdən əvvəl universitetin
müəllim-tələbə heyəti Şəhidlər
xiyabanını ziyarət edərək, şəhidin məzarı
önünə qərənfillər düzdülər. Tədbir
ADU-da şəhidin adını
daşıyan muzey-lektoriyanın qarşısında davam etdirildi. Öncə
şəhidlərin xatirəsi bir dəqiqəlik
sükutla yad edildi. Mərasimdə ADU-nun
elmi işlər üzrə prorektoru, professor Dünyamin Yunusov, tərbiyə
işləri üzrə prorektor Ələddin
Əliyev və Ülvinin atası Yusif Bünyadzadə
iştirak edirdilər. Tədbiri Tələbə
Gənclər Təşkilatı nəzdində " Ülvi" vətənpərvər
klubunun sədri, tərcümə
fakültəsinin tələbəsi Kamil Zeynalov açaraq Ülvinin
şücaətindən danışdı.
Mərasimdə
çıxış edən ADU-nun elmi işlər üzrə
prorektoru, professor Dünyamin Yunusov Azərbaycan xalqının
azadlıq uğrunda
apardığı mübarizədə minlərlə
oğul və qızımızın öz canlarını fəda
etmələrindən və onların şəhidlik zirvəsinə
ucaldıqlarından danışdı. Prorektor bildirdi ki, Ülvi
Bünyadzadənin əziz xatirəsi daim xatirələrdə
canlanacaq və qəhrəmanlığı digərlərinə
də nümunə olacaq.
Sonra çıxış edən fəlsəfə
kafedrasının professoru Məhəmməd Teymurlu Ülvi
haqqında xatirələrdən söhbət açdı.
Şəhidin ADU-da təhsil alan hər bir tələbənin
cəsarət nümunəsinə çevriləcəyindən
danışan M.Teymurlu Ülvinin qəlblərdə əbədi məşəl
yandırdığını qeyd etdi.
Ülvinin qəhrəmanlığından,
cəsarətindən ADU-nun tələbələri də
danışdılar. Filologiya fakültəsinin 4-cü kurs tələbəsi Könül Yaqubova Ülvinin onun üçün
qürur mənbəyi olduğunu tədbir
iştirakçılarının diqqətinə
çatdırdı: "Mən fəxr edirəm ki,
Ülvinin təhsil
aldığı universitetdə oxuyur, onun oturduğu auditoriyada dərs keçirəm".
ADU-nun
regionşünaslıq və beynəlxalq münasibətlər
fakültəsinin 273-cü qrup
tələbəsi Əmir Hacılı və
359-cu qrup tələbəsi
Aytən Hüseynova Ülvinin əsgərlik xatirələrindəki
şeirlərini söylədilər.
Mərasimin sonunda Ülvinin atası Yusif Bünyadzadə
çıxış edərək oğlunun Vətənə
olan sevgisindən söz açdı. Azərbaycanın qəhrəman
oğullar yetişdirdiyinə toxunan Y.Bünyadzadə
Ülvinin göstərdiyi igidliyə görə fəxr
etdiyini dedi. O, universitetin rektoru,
professor Səməd Seyidova və tədbiri təşkil edənlərə
öz minnətdarlığını bildirdi.
Z.KAZIMOVA
Azərbaycan müəllimi.- 2010.- 24 sentyabr.- S.4.