Azərbaycan Dillər Universitetində 33 tələbə italyan dilini öyrənir

 

Sentyabrın 17-də Azərbaycan Dillər Universiteti İtaliyanın Peruca Universiteti arasında mövcud əməkdaşlığın davam etdirilməsinə dair müqavilənin imzalanması mərasimi keçirildi. ADU-un rektoru, professor Səməd Seyidov bildirdi ki, rəhbərlik etdiyi təhsil ocağı ilə Peruca Universiteti arasında əlaqələr  getdikcə artır İtaliya ilə  olan münasibətlər digər  sahələrdə olduğu kimi, təhsil sahəsində inkişaf edir. Hazırda universitetdə bir sıra  Avropa ölkələrinin mərkəzləri, o cümlədən İtaliya mərkəzi fəaliyyət göstərir. Bu, italyan dilini daha yaxşı  mənimsəməyə kömək edir.

Sonra Peruca Universitetinin rektoru, professor, xanım Stefani Giannini çıxış edərək səmimi qəbula görə  S.Seyidova təşəkkür etdi. Universitetlərarası əlaqələrdən danışan italiyalı qonaq qarşılıqlı təcrübə  mübadiləsi üçün əlverişli imkanların mövcud olduğunu söylədi. Bildirdi ki, Azərbaycanda italyan dilinə maraq artıb, bu, tələbələrin sayında  özünü göstərir. "Üç il bundan qabaq universitetinizə səfər etdiyim  zaman ADU-da 12 tələbə italyan dilini öyrənirdisə, indi bu dildə oxuyan tələbələrin sayı 33-ə çatıb".

İmzalanma mərasimindən  sonra  tədbir ADU-nun İnformasiya Resurs Kompleksində davam etdi. Tədbirdə İtaliyanın mədəniyyəti, dili, tarixi  haqqında iştirakçılara ətraflı məlumat verildi. Universitetin II IV kurs tələbələri italyan dilində  mahnı  oxudular. Azərbaycanın 10 bölgəsi  barədə məlumatları italyan dilində özündə əks etdirən slayd  təqdim olundu. Heydər Əliyev Fondunun Azərbaycan haqqında reklam çarxı nümayiş etdirildi.

İtaliyanın Azərbaycandakı  fövqəladə səlahiyyətli səfiri  Mario Baldi universitetdə keçirilən bu  tədbirin əhəmiyyətindən söz açdı iki ölkə arasında dostluq əlaqələrinin daha da  genişləndiyindən danışdı

 

 

Azərbaycan müəllimi.- 2010.- 24 sentyabr.- S.3.