Akademik Zərifə Əliyeva adına orta məktəbdə İngilis dilinin Onlayn tədrisi (ETTO) layihəsinin təqdimatı olub

Yanvarın 11-də akademik Zərifə Əliyeva adına orta məktəbdə Azərbaycanda ingilis dili müəllimləri üçün ilk dəfə olaraq İngilis dilinin Onlayn tədrisi (ETTO) ixtsasartırma layihəsinin başlanmasına həsr olunmuş mərasim keçirildi.

Tədbirdə Təhsil Nazirliyinin nümayəndələri, ayrı-ayrı regionlarda orta məktəblərdə işləyən ingilis dili müəllimləri və KİV nümayəndələri iştirak edirdilər. Tədbiri giriş sözü ilə təhsil naziri Misir Mərdanov açaraq bildirdi ki, 2003-cü ildən indiyə kimi Təhsil Nazirliyi "British Council"in Azərbaycan nümayəndəliyi ilə xeyli faydalı layihələr həyata keçirib. Bizim ölkədə əvvəllər ingilis dilinin tədrisi intensiv olmamışdır. Sonralar Bakının 7 orta məktəbində ingilis dilinin intensiv tədrisinə geniş yer verildi və bu sahədə də böyük uğurlar əldə edilmişdir.

Təhsil naziri Misir Mərdanov qeyd etdi ki, bu layihədə bütün fəaliyyətlər, tapşırıqlar, video və audiomateriallar hələlik ibtidai siniflərdə dərs deyən ingilis dili müəllimləri üçün nəzərdə tutulub. Yanvarın 15-dən başlanan bu kursda Gəncə, Zaqatala, İsmayıllı, Sumqayıt və Bakı məktəblərinin ibtidai siniflərində ingilis dilindən dərs deyən 48 müəllim iştirak edəcək. Kurs boyu müəllimlərə onlayn təlimçi dəstək olacaq və sonda müəllimlərə kursdan keçmələri haqqında sertifikatlar veriləcək. ümid edirəm ki, həyata keçirilən bu layihə Azərbaycan məktəblərində dərs deyən ingilis dili müəllimləri üçün daha uğurlu olacaq.

Təhsil naziri Misir Mərdanov bu işə rəhbərlik edən "British Council"in Azərbaycan nümayəndəliyinin layihə rəhbəri Gülşən Hüseynovaya öz təşəkkürünü bildirdi və onlara bu işdə uğurlar arzuladı.

Tədbirdə iştirak edən xarici təşkilatın nümayəndəsi xanım Rozmari Arnot Təhsil Nazirliyi ilə aparılan səmərəli işin səviyyəsindən razı qaldığını dedi və gələcəkdə Azərbaycanın bütün tədris müəssisələrində ingilis dilinin yüksək səviyyədə öyrədilməsi üçün bu fənnin tədrisi sahəsində daha böyük layihələr həyata keçiriləcəyindən danışdı.

Şakir CƏFƏROV

Azərbaycan müəllimi.-2010.-15 yanvar.-S.2.