Regionlarda təhsilin inkişaf perspektivlərilə əlaqədar Ağstafa, Qazax və Tovuz rayonları təhsil işçilərinin iştirakı ilə müşavirə keçirilib

Yanvarın 25-də Ağstafa rayonunda regionlarda təhsilin inkişafı ilə əlaqədar Ağstafa, Qazax və Tovuz rayonları təhsil işçilərinin iştirakı ilə müşavirə keçirildi. İlk öncə təhsil naziri Misir Mərdanov müşavirə iştirakçıları ilə birlikdə Heydər Əliyev Mərkəzində, rayonun A.Mustafayev adına Həsənsu kənd orta məktəbində və Ağstafa Tikiş Fabrikində oldu.

Heydər Əliyev Mərkəzində keçirilən müşavirəni giriş sözü ilə açan Ağstafa Rayon İcra Hakimiyyətinin başçısı Elxan Usubov rayonda təhsil sahəsində görülmüş işlər barədə qısa məlumat verdi.Bildirdi ki, ölkəmizdə, eləcə də Ağstafada son illər təhsilin inkişafına olan qayğı, tələbkarlıq öz müsbət nəticəsini vermişdir. Cənab Prezidentin sərəncamı ilə təsdiq olunmuş Azərbaycan Respublikası regionlarının sosial-iqtisadi inkişafı Dövlət Proqramına uyğun olaraq yeni məktəb binaları tikilmiş və bəziləri əsaslı təmir olunmuşdur. Yeni nəslin təlim-tərbiyəsinə, təhsil işçilərinə göstərdiyi diqqət və qayğıya görə rayonumuzun bütün təhsil işçiləri adından möhtərəm Prezidentimiz cənab İlham Əliyevə öz səmimi minnətdarlığımızı bildiririk.Ölkəmizin iqtisadi inkişafı, xalqımızın xoşbəxt rifahı naminə həyata keçirdiyi uğurlu fəaliyyətində dövlətimizin başçısına müvəffəqiyyətlər arzulayırıq.

Müşavirədə iştirak edən təhsil naziri Misir Mərdanov Azərbaycanda təhsilin inkişafında və qazanılmış uğurlarda ölkə başçısının böyük xidməti olduğunu qeyd etdi. Bildirdi ki, bu gün hər addımda ulu öndər Heydər Əliyevin ölməz ideyalarına sadiqlik nümayiş etdirən Prezident İlham Əliyevin həyata keçirdiyi uğurlu siyasətin ali məqsədi Azərbaycanın hər bir vətəndaşı üçün layiqli və firavan həyat tərzinin təmin olunması, ölkədə azad və demokratik cəmiyyətin qurulmasıdır. Nazir ölkənin Prezidenti İlham Əliyev tərəfindən imzalanmış fərman və sərəncamlara xüsusi münasibətini bildirdi. Qeyd etdi ki, 10 ildən çox idi ki, ölkə ictimaiyyətini maraqlandıran ən ciddi məsələ "Təhsil haqqında" Qanunun qəbul edilməsi həllini gözləyirdi. Nəhayət, bu Qanun möhtərəm Prezidentin dəstəyi ilə Milli Məclisdə qəbul olundu və onun icrası ilə bağlı işlər də görülür. Az müddət ərzində Təhsil Nazirliyi Aparatında Qanunla bağlı 35 adda sənəd hazırlanıb Azərbaycan hökumətinə təqdim olunmuşdur ki, bunlardan 6-sı artıq təsdiq olunub. ölkə başçısı tərəfindən 2009-cu il "Uşaq ili" elan olunmuş, təhsil sahəsində çalışan müəllimlər, şagirdlər və müxtəlif sahələrdə işləyən insanların mükafatlandırılması, BDU-nun 90 illik yubileyi, Azərbaycan Respublikasında elmin inkişafı ilə bağlı milli strategiyanın, ali təhsil sistemində islahatların həyata keçirilməsi ilə bağlı sərəncamlar imzalanıb. Həm də Prezidentin sərəncamı ilə "Ən yaxşı ümumtəhsil məktəbi", "Ən yaxşı müəllim" müsabiqələri keçirilir və qalib məktəblər 10000, müəllimlər isə 5000 manat məbləğində mükafatlara layiq görülmüşlər. Bu da son iki ildə ölkədə ümumtəhsil sistemində çox ciddi inkişafa yönəldilmiş rəqabətə səbəb olub.

2009-cu ildə ölkə başçısının müxtəlif sərəncamları ilə 312 nəfər təhsil işçisinə dövlət mükafatları, fəxri adlar verilib.

Sonra Təhsil Nazirliyində həyata keçirilmiş bəzi məsələlərlə bağlı Dünya Bankı ilə Azərbaycan Respublikasının Təhsil Nazirliyi arasında həyata keçirilən tədbirlər barədə məlumat verildi.

Regionlarda təhsilin inkişaf perspektivlərindən danışan nazir Mİsir Mərdanov son beş ildə Ağstafa, Qazax və Tovuz rayonlarının ümumtəhsil məktəblərinin I sinif şagirdləri, IX və XI sinfi bitirənlər, ümumtəhsil məktəbləri şəbəkəsi, siniflərdə şagird sıxlığı, şagird-müəllim nisbəti regionda məktəb və əlavə sinif otaqlarının tikintisinin aparılmasından, məktəblərin avadanlıqlarla təminatı məsələlərindən geniş bəhs etdi. 2003-2009-cu illərdə Tovuzda 10,Qazaxda 11, Ağstafada 8 yeni məktəb binasının tikildiyini qeyd etdi.

2008-2009-cu tədris ilində hər üç rayonun ümumtəhsil məktəblərinin fəaliyyətindən, ali məktəblərə qəbul imtahanlarında həmin rayonlar üzrə abituriyentlərin göstərdiyi nəticələrdən söz açan Misir Mərdanov göstəricisi aşağı olan məktəblərin adlarını çəkdi. Bildirdi ki, bu məsələ rayon ictimaiyyətinin diqqət mərkəzində olmalı və fəaliyyəti pis olan məktəb direktorları haqqında ciddi tədbir görülməlidir.Həm də məktəb direktorlarının seçimində də diqqətli olmağı tövsiyə etdi.

Məktəbəqədər təhsilin yeniləşdirilməsi proqramının tətbiqi üzrə proqram çərçivəsində müəyyən işlərin görülməsində ölkə başçısının xidmətlərini deyən Misir Mərdanov hazırda Bakı şəhərində bağçalarda uşaqların sayının artdığını bildirdi. Bütün bunlar yeni məktəbəqədər müəssisələrin tikilməsi, təmiri və onların lazımi avadanlıqlarla təmin olunması nəticəsində mümkün olduğunu söylədi.

Təhsil naziri Misir Mərdanov müşavirə iştirakçılarının nəzərinə onu da çatdırdı ki, Tovuz rayonunda son beş ildə bağçaların sayında elə bir dəyişiklik olmasa da, təəssüf ki, bağçaya gedən uşaqların sayı azalıb. Nazir həm də Qazax və Ağstafa rayonlarında olan bağçalarda da belə halların mövcudluğunu dedi. Bilməliyik ki, bağçamız yaxşı olmasa, bağçaya gələn uşaqların sayı heç olmasa 70-80 faizi əhatə etməsə, onda biz təhsilimizin inkişafından danışa bilmərik. Ona görə də Təhsil Nazirliyi, rayon rəhbərliyi və rayon təhsil şöbəsi deyilən bu məsələni daim diqqət mərkəzində saxlamalıdır.

Gələcəkdə əsas və orta məktəblərdə oxuyacaq şagirdlərin minimum sayı müəyyənləşməli, şagirdi az olan məktəblərin açılmasına yol verilməməlidir, - deyən nazir Misir Mərdanov məktəblərdəki istilik sistemi və regionda olan məktəblərin maddi-texniki təchizat məsələsində olan nöqsanlardan söz açdı.

Məktəblilərin dərsliklərlə təminatında heç bir problemin olmadığını vurğulayan nazir bu istiqamətdə çox ciddi şəkildə iş aparıldığını diqqətə çatdırdı.Bu gün məktəblərdə təhsilin keyfiyyətini qaldırmaqda həlledici amil müəllimdir. ölkə ictimaiyyəti bu gün biz təhsil işçilərindən daha keyfiyyətli təhsil gözləyir.Ona görə də bu istiqamətdə çox ciddi iş görməliyik.

Nazir Misir Mərdanov məktəblərdə işləyən müəllimlərin ixtisasının artırılması, orta məktəblərin IX-XI sinifləri üzrə mərkəzləşdirilmiş qaydada keçiriləcək imtahanlar, bu regionda peşə təhsili mərkəzlərinin tikilməsi və peşə təhsili müəssisələrində ayrı-ayrı fənlərin tədrisi vəziyyətini daha da yaxşılaşdırmaq üçün İKT-nin tətbiqinin genişləndirilməsinin vacibliyini tədbir iştirakçılarının nəzərinə çatdırdı.

Çıxışının sonunda təhsil naziri Misir Mərdanov Qazax rayonundan olan iki müəllimə "Azərbaycan Respublikasının qabaqcıl təhsil işçisi" döş nişanını, Ağstafa, Tovuz və Qazax rayonlarının təhsil müəssisələrində işləyən bir qrup müəllimə isə Fəxri fərmanlar təqdim etdi.

Tədbirdə Qazax Rayon İcra Hakimiyyətinin başçısı Rauf Hüseynov, Tovuz Rayon İcra Hakimiyyətinin başçısı Tofiq Zeynalov və millət vəkili Nizami Cəfərov da çıxış edərək qeyd etdilər ki,ulu öndərimizin əsasını qoyduğu təhsil islahatları bu gün də möhtərəm Prezidentimiz İlham Əliyev cənablarının rəhbərliyi altında böyük uğurla davam etdirilir. Xüsusən, respublikanın hər yerində yeni məktəblərin tikilməsi, mövcud məktəblərin əsaslı təmiri, təhsil ocaqlarının müasir tələblərə cavab verən avadanlıqlarla təchizi sahəsində son illər böyük uğurlar əldə edilmişdir. Eləcə də bu gün ölkəmizdə elm, təhsil, mədəniyyət və s. sahələrlə bağlı layihələr həyata keçirən Heydər Əliyev Fondu təhsilimizin inkişafına öz töhfəsini verir.

Günün ikinci yarısında təhsil naziri Misir Mərdanov qonaqlarla birlikdə rayonun 1 və 2 nömrəli Dağkəsəmən kənd, 2 nömrəli şəhər orta məktəblərinə, həmçinin 2 nömrəli uşaq bağçasına baş çəkdi, sinif otaqlarına, kompüter kabinetlərinə, laboratoriyalara, kitabxanalara, idman və iclas zalına baxdı. Burada çalışan pedaqoji kollektivin üzvləri ilə söhbət edərək onların arzu və istəklərini dinlədi.

Şakir CƏFƏROV

Azərbaycan müəllimi.-2010.-29 yanvar.-S.3.