"Heydər Əliyev və Azərbaycan gəncliyi" mövzusunda konfrans keçirilib

Naxçıvan Özəl Universitetində 2 fevral - Gənclər Günü münasibətilə "Heydər Əliyev və Azərbaycan gəncliyi" mövzusunda elmi-praktik konfrans keçirildi.

Konfransı giriş sözü ilə universitetin tərbiyə işləri üzrə prorektoru Əli Yusifov açaraq qeyd etdi ki, hər bir dövlətin parlaq sabahı onun gənclərinin hərtərəfli inkişafından asılıdır. Məhz bu baxımdan ümummilli liderimiz Heydər Əliyev həmişə gəncliyə böyük diqqət və qayğı göstərmişdir. Ulu öndərin ölkəmizdə gənclər və idman siyasətinin həyata keçirilməsi sahəsindəki xidmətləri əvəzsizdir.1996-cı il fevralın 2-də müstəqil Azərbaycan dövlətçiliyinin tarixində ilk dəfə olaraq ölkə gəncləri özlərinin birinci forumuna toplaşdılar.1997-ci ildə Azərbaycan gənclərinin birinci forumunun ildönümü ərəfəsində ümummilli liderimiz Heydər Əliyevin sərəncamı ilə forumun keçirildiyi gün "2 fevral - Gənclər Günü" kimi elan olundu.

Naxçıvan MR Gənclər və İdman Nazirliyinin gənclərlə iş şöbəsinin müdiri Həsən Əliyev "Azərbaycan gəncliyi inkişaf və tərəqqi yollarında" mövzusunda məruzə edərək bildirdi ki, bu gün gənclərimiz dövlət idarəçiliyində, xalq təsərrüfatının ayrı-ayrı sahələrində, elm, təhsil, siyasət və idman sahələrində səylə çalışırlar.

Naxçıvan Özəl Universitetinin tələbələrindən Hacı Hacıyev "Gənclər və milli mənəvi dəyərlərimiz", Elvin Əliyev "Müasir gənclik Azərbaycanın gələcəyinin yaradıcısıdır " mövzularında məruzələr etmişlər.

Mina QASIMOVA

Azərbaycan müəllimi.-2010.-29 yanvar.-S.1.