Kamilliyin yolu mütaliədən keçir

Naxçıvan Dövlət Universitetinin Elmi kitabxanasında Ümumdünya Kitab və Müəllif Hüquqları Gününə həsr olunmuş tədbir keçirildi.

Tədbiri giriş sözü ilə rektor, akademik İsa Həbibbəyli açaraq müasir dövrdə informasiya vasitələrinin günbəgün çoxalmasına baxmayaraq, kitabın, mütaliənin gənclərin hərtərəfli intellektual potensiala, yüksək mənəviyyata malik, vətənpərvər ruhda, kamil şəxsiyyət kimi formalaşmasında əvəzsiz rol oynamasından danışdı. Rektor yeni nəşrlərin təbliği, müəlliflərlə görüşlərin təşkili, artmaqda olan oxucu tələbatının ödənilməsi istiqamətində universitetin elmi kitabxanasının fəaliyyətini yüksək qiymətləndirdi.

Kitabxananın direktoru, filologiya elmləri üzrə fəlsəfə doktoru Aypara Behbudova məruzəsində bildirdi ki, Ümumdünya Kitab və Müəllif Hüquqları Günü BMT-nin elm, təhsil və mədəniyyət məsələləri üzrə ixtisaslaşmış təşkilatı olan YUNESKO-nun 1995-ci il tarixli qərarına əsasən maarifçilik və mədəni əlaqələrin dərk olunmasının inkişafı məqsədilə, kitabın ən geniş bilik mənbəyi, bütün biliklərin ən etibarlı saxlanma üsulu olması nəzərə alınaraq təsis edilmişdir. Azərbaycanda da müəllif hüquqlarına, əqli mülkiyyət sahəsinin inkişafına, bu sahədə qanunvericiliyin təkmilləşdirilməsinə dövlət tərəfindən xüsusi diqqət yetirilir. Ümummilli liderimiz Heydər Əliyevin təşəbbüsü və dəstəyi ilə 1993-cü ildə Azərbaycanda Milli Müəllif Hüquqları İnstitutu yaradılmış, 1996-cı ildə isə "Müəlliflik hüququ və əlaqəli hüquqlar haqqında" Qanun qəbul edilmişdir. Azərbaycan Respublikası 1997-ci ildə YUNESKO-nun Müəllif Hüquqları Ümumdünya Konvensiyasına qoşularaq, geniş beynəlxalq əməkdaşlığa cəlb olunmuşdur. Möhtərəm Prezident İlham Əliyev tərəfindən də bu sahə ilə bağlı qanunvericilik aktları qəbul edilmişdir.

Digər çıxışçılar - universitetin "Qeyrət" nəşriyyatının direktoru, tarix elmləri üzrə fəlsəfə doktoru, şair-publisist Vaqif Məmmədov, Kitabxanaçılıq kafedrasının müdiri, pedaqogika üzrə fəlsəfə doktoru, dosent Nəzakət İsmayılova, Sosial idarəetmə və turizm kafedrasının müəllimi Cahan Bayramova, kitabxanaçılıq ixtisası üzrə I kurs tələbəsi Fəridə Əliyeva Azərbaycanda, o cümlədən muxtar respublikada nəşriyyat-poliqrafiya, kitabxana işinin müasir inkişaf səviyyəsindən, müəlliflik hüququnun pozulmasına qarşı nəzərdə tutulan qanunvericilik aktlarından bəhs etmişlər.

Tədbir iştirakçıları universitet əməkdaşlarının yeni əsərlərindən ibarət sərgi ilə də tanış olmuşlar.

Mehriban SULTAN

Azərbaycan müəllimi.- 2011.- 29 aprel.- S.10.