"Atam Qabilin qəribə əhvalatları"

Xalq şairi Qabil dövrümüzün ən çox sevilən, oxunan və sayılan şairlərdən biridir. Onun yaradıcılıq yolu şəxsiyyəti ilə həmahəngdir. Xatırladaq ki, o, 1948-ci ildə Azərbaycan dili və ədəbiyyat müəllimi kimi Yardımlı rayonunda dərs deyib. Elə həmin ilin sonlarında isə "Azərbaycan müəllimi" qəzetində müxbir kimi fəaliyyət göstərib. Bütün bunlarla bərabər o, yaradıcılığı, poeziyası ilə Azərbaycan şeirini zənginləşdirən şairlərimizdəndir. O, müasirimiz olsa da hələ sağlığında klassikləşmiş sənətkardır.

Qabil bütün yaradıcılığı, dillər əzbəri olan "Səhv düşəndə yerimiz", "Bakılı", "Çörək", "Azərbaycan torpagı", "Göygöl", "Türkün qəbri", "Qoru özünü", "Sənə qurban" kimi qeyri-adi şeirləri və "Nəsimi" kimi fundamental poeması ilə əbədiyaşarlıq tapmışdı. Eyni zamanda həyatda mehriban, səmimi və duzlu zarafatları ilə yanaşı, onun haqqında yaradılan maraqlı lətifələr də oxuculara çoxdan bəllidir.

Bu günlərdə oxucular üçün yeni olan Mahir Qabiloğlu tərəfindən yazılmış "Atam Qabilin qəribə əhvalatları" ("Nurlan" nəşriyyatı, Bakı, 2011, 86 səh.) kitabı Həsən Həsənovun redaktorluğu ilə işıq üzü görüb. Xalq şairi Qabilin 85 illiyi münasibəti ilə yazılmış bu kitabda Mahir "Müəllifdən" yazısında qeyd edir ki, zaman keçdikcə çox şey unudulur, elə buna görə də onlardan (əhvalatlardan) bəzilərini mən də geniş ictimaiyyətə çatdırmaq üçün qələmə almaq niyyətinə düşdüm. Kitabın adını isə görkəmli yazıçımız İsmayıl Şıxlıya istinadən- o, "Dostum Qabilin qəribə əhvalatları" qoymuşdu, mən isə "Atam Qabilin qəribə əhvalatları" qoydum...

Həmin kitabda Mahir Qabiloğlunun bilavasitə iştirakçısı və şahidi olduğu əlliyə yaxın bir-birindən maraqlı əhvalat toplanıb. Bu əhvalatlar içərisində gülməlisi də, düşündürəni də var, bir çox mətləblərə aydınlıq gətirəni də...

İnanırıq ki, şirin, sadə bir dillə yazılmış nəfis tərtibatlı kitab bütün Qabilsevərlərin sonsuz marağına səbəb olacaq.

ƏDALƏT

Azərbaycan müəllimi.- 2011.- 19 avqust.- S.8.