Sumqayıtda gənc rəssamların sərgisi keçirildi

Yanvarın 28-də Sumqayıtda yerləşən Uşaq və Yeniyetmələrin Yaradıcılıq Mərkəzində rəsm sərgisi keçirildi. Mərkəzin rəssamlıq dərnəyinin üzvləri Gülnar Məmmədova və Əfsanə Piriyevanın rəsm əsərlərindən ibarət olan sərgidə Sumqayıt Şəhər İcra Hakimiyyətinin nümayəndələri, təhsil ictimaiyyəti və digər qonaqlar iştirak edirdilər.

Tədbiri giriş sözü ilə açan mərkəzin direktoru Əntiqə Rzayeva qonaqları salamlayaraq, 2 fevral Gənclər gününə həsr olunmuş sərginin 2003-cü ildən bu günə qədər keçirilən fərdi sərgilərin 100-cü yubileyi olduğunu bildirdi. Qeyd edildi ki, mərkəz gənclərin asudə vaxtlarının səmərəli təşkil edilməsi və yaradıcılıq fəaliyyəti ilə sərbəst məşğul olması məqsədilə öz işini onların maraq dairəsinə uyğun olaraq qurur. Mərkəzdə fəaliyyət göstərən təsviri incəsənət dərnəyində də məhz belə istedadlı gənclər üzə çıxarılaraq onlara sənətin sirləri öyrədilir. O, hər iki gənc rəssam haqqında xoş fikirlərini bildirərək, onlara müvəffəqiyyətlər arzuladı.

Sonra söz Sumqayıt Şəhər İcra Hakimiyyəti başçısının müavini Ramiz Həsənova verildi. O, hər iki gəncin rəsm əsərlərinə baxdıqda qürur hissi keçirdiyini və belə gənclərin olmasının respublika üçün böyük əhəmiyyət kəsb etdiyini bildirdi. Qeyd edildi ki, hazırda respublikamızda gənclərin potensiallarının üzə çıxarılması istiqamətində xeyli işlər görülür. Ölkə Prezidenti cənab İlham Əliyevin müvafiq sərəncamlarına əsasən gənclərə göstərilən diqqət və qayğıdan söz açan R.Həsənov bu yöndə aparılan işləri təqdirəlayiq hal kimi qiymətləndirdi. Bildirildi ki, yeni tikilib istifadəyə verilən və gənclərin istedadını üzə çıxaran Uşaq və Yeniyetmələrin Yaradıcılıq Mərkəzi müasir standartlara cavab verir. O, gənclər üçün hər bir şəraitin yaradıldığını nəzərə çatdıraraq, onların bu imkanlardan maksimum dərəcədə yararlanacaqlarından ümidvar olduğunu bildirdi.

Sərgi ilə tanış olan Sumqayıt Şəhər Təhsil Şöbəsinin müdiri Vidadi Bağırov Gülnar və Əfsanənin rəsmləri barədə xoş fikirlər səsləndirdi. O, belə tədbirlərin keçirilməsinin vacibliyini vurğulayaraq qeyd etdi ki, gənclərin fikirlərini və maraqlarını yaradıcılıq və digər faydalı sahələrə yönəltmək və onların istedadını üzə çıxarmaq qarşımızda duran əsas vəzifələrdən biridir. Hesab edirəm ki, bu istiqamətdə aparılan işlər artıq öz bəhrəsini verməkdədir. Belə ki, bu gün təşkil olunmuş sərgi hamı kimi bizi də sevindirir. Gülnar və Əfsanənin valideyn və müəllimlərinə öz təşəkkürünü bildirən V.Bağırov onlara gələcək işlərində uğurlar arzuladı.

Sərgidə çıxış edən Sumqayıt Şəhər Gənclər və İdman İdarəsinin rəisi Musa Həsənov, 25 nömrəli orta məktəbin direktoru Əvəz Mahmud Lələdağ gənc rəssamlar və onların çəkdikləri rəsmlər haqqında müsbət fikirlər söylədilər.

Sonda gənc rəssamlara diplom və hədiyyələr verildi.

Niyazi RƏHİMOV

Azərbaycan müəllimi.- 2011.- 4 fevral.- S.23.