"Elektron təlimləndirən sistemlər" layihəsinə həsr olunmuş tədbir

Fevralın 5-də Təhsil Nazirliyində xüsusi qayğıya ehtiyacı olan məktəbyaşlı uşaqlar üçün "Elektron təlimləndirən sistemlər" layihəsinə həsr olunmuş tədbir keçirildi. Tədbirdə Təhsil Nazirliyinin və Bakı Şəhəri üzrə Təhsil İdarəsinin rəhbər işçiləri, layihəni reallaşdıran "Nobel-T" MMC-nin əməkdaşları, Səbail rayonundakı 219 nömrəli evdə məktəbin layihənin həyata keçirilməsi üçün cəlb olunmuş 30 nəfər xüsusi qayğıya ehtiyacı olan şagirdi və müəllimləri iştirak edirdi.

Tədbiri giriş sözü ilə açan təhsil naziri Misir Mərdanov bildirdi ki, "2008-2012-ci illərdə Azərbaycan Respublikasında təhsil sisteminin informasiyalaşdırılması üzrə Dövlət Proqramı" çərçivəsində ölkədə distant təhsilin inkişaf etdirilməsi, eyni zamanda xüsusi qayğıya ehtiyacı olan şagirdlərin bu prosesə daha yaxından cəlb olunması ilə əlaqədar "Elektron təlimləndirən sistemlər" adlı layihə işlənib hazırlanıb. Layihə haqqında məlumat verən nazir qeyd etdi ki, əsas məqsəd məsafədən təhsilin inkişafı, layihəyə cəlb olunmuş xüsusi qayğıya ehtiyacı olan şagirdlərin təhsilalma imkanlarının yaxşılaşdırılması, kompüter və elektron resurslardan istifadə bacarıqlarının artırılması, Azərbaycan təhsil səbəkəsinə və İnternetə çıxış imkanlarının yaxşılaşdırılmasından ibarətdir. Təhsil naziri daha sonra vurğuladı ki, layihə çərçivəsində 30 şagird və 7 müəllimə ən yeni texnologiya proqram təyinatları ilə təchiz olunmuş APL- İN şirkətinin istehsalı olan noutbuklar təqdim ediləcək. 30 şagirdin təhsil aldığı müəssisənin Azərbaycan təhsil şəbəkəsinə və İnternetə çıxışla təmin olunmasına artıq başlanılıb. Şagirdlərin dərs prosesinin idarə edilməsi məqsədi ilə müəllimlər üçün ayrılan tədris məkanının yüksək sürətli fibro-optik İnternet və İntranet bağlantılarla təchiz olunması təmin ediləcək. "Elektron təlimləndirən sistemlər" təlim məsafəsi əsasında 16 təlimçi müəllimin hazırlanması təmin olunacaq. Yeni hazırlanmış təlimçilər tərəfindən məktəbyaşlı uşaqlar üçün məsafədən təhsilin köməyi ilə "Elektron təlimləndirən sistemlər" təlim məsafəsi əsasında təlimlərin təşkil olunması planlaşdırılıb. Nəhayət, müəllim, şagird və valideynlərin təhsil prosesinə cəlb olunması üçün yeni portalın yaradılması da nəzərdə tutulur. Bu işi görərkən şagirdlərin daha yaxşı təlim almasına, müasir təlim texnologiyalarından istifadə olunmasına diqqət daha da artırılacaq. Misir Mərdanov layihənin həyata keçirilməsinə dəstək verən Heydər Əliyev Fonduna və bu işdə əməyi olan bütün təşkilatlara təşəkkürünü bildirdi.

Sonra təhsil naziri Bakı şəhərindəki 219 nömrəli evdə məktəbin 30 şagirdinə və müəllimlərə noutbuk və sertifikatlar təqdim edərək onlara uğurlar arzuladı.

Tədbirin sonunda çıxış edən 219 nömrəli evdə məktəbin direktoru Sədaqət Məmmədova layihənin əhəmiyyətindən danışaraq Heydər Əliyev Fonduna, Təhsil Nazirliyinə, Bakı Şəhəri üzrə Təhsil İdarəsinə və "Nobel-T" MMC-nin rəhbərliyinə, məktəbin müəllim və şagirdlərinə göstərdikləri yüksək qayğıya görə təşəkkürünü bildirdi.

Ədalət DAŞDƏMİRLİ

Azərbaycan müəllimi.- 2011.- 11 fevral.- S.3.