Azərbaycanın Milli Qəhrəmanları

Rzayev Canpolad Yaqub oğlu

1968-ci il fevralın 26-da Ağdam rayonunun Çuxurməhlə kəndində anadan olub. Rayonun Əhmədavar kəndindəki orta məktəbin səkkizinci sinfini bitirib. O, bir müddət kolxozda işləyib. 1988-ci ildə ordu sıralarına çağırılıb, hərbi xidmətini raket qoşunları hissəsində keçirib. Xidmətini başa çatdırdıqdan sonra hərbi hissədə qalıb təhsilini davam etdirib. 1992-ci il fevralın 26-da xalqımız öz taleyinin ən ağır və acılı anlarını yaşayırdı. XX əsrin sonunda təkcə Azərbaycan xalqına qarşı deyil, bütün insanlığa qarşı ən ağır cinayətlərdən biri - Xocalı faciəsi baş verdi. Belə bir gərgin vəziyyətdə Canpolad əhalinin təhlükəsizliyinin təmin edilməsində fədakarlıq göstərib.

C.Rzayev Qaraqaya uğrunda erməni işğalçılarına qarşı gedən döyüşlərdə əsl qəhrəmanlıq nümunəsi nümayiş etdirərək qəhrəmancasına həlak olub.

Ailəli idi. İki övladı var.

Azərbaycan Respublikası Prezidentinin 7 iyun 1992-ci il tarixli 833 nömrəli Fərmanı ilə Rzayev Canpolad Yaqub oğlu ölümündən sonra Azərbaycanın Milli Qəhrəmanı adına layiq görülüb.

Məzarı Ağdamın düşmən işğalı altında olan Şəhidlər xiyabanındadır.

Salahov Şakir Şamil oğlu

1966-cı il iyunun 15-də Xocalı rayonunun Cəmilli kəndində anadan olub. 1981-ci ildə kəndlərindəki səkkizillik məktəbi, sonra isə orta məktəbi bitirib. Şakir 1984-cü ildə hərbi xidmətə çağırılıb. 1986-cı ildə əsgəri xidmətini başa çatdırdıqdan sonra Xankəndi Şəhər Daxili İşlər İdarəsinin mühafizə şöbəsində işə qəbul olunub. Ş.Salahov 1991-ci ildə Azərbaycan Dövlət Pedaqoji Universitetinin Şuşa şəhər filialında fizika-riyaziyyat fakültəsinə daxil olub. 1991-ci il avqustun 23-də Kosalar və Cəmilli kəndləri uğrunda erməni işğalçılarına qarşı gedən ağır döyüşlərdə xüsusi igidlik nümayiş etdirərək yağı düşmənin xeyli canlı qüvvəsini məhv edib. Amma erməni hərbi birləşmələri irimiqyaslı hücum əməliyyatlarını davam etdirirdi. Cəbhə xəttini yarıb hərbi hissələri mühasirəyə almaq istəyirdilər. Şakir isə düşmənin bu bəd niyyətinin həyata keçməsinə imkan vermirdi.

Ş.Salahov 1992-ci ildə Kosalar kəndi uğrunda gedən qeyri-bərabər döyüşlərdə qəhrəmancasına həlak olub.

Azərbaycan Respublikası Prezidentinin 8 oktyabr 1992-ci il tarixli 264 nömrəli Fərmanı ilə Salahov Şakir Şamil oğlu ölümündən sonra Azərbaycanın Milli Qəhrəmanı adına layiq görülüb.

Bərdə şəhərindəki Şəhidlər xiyabanında dəfn olunub.

Sarıyev Zaur Rəşid oğlu

1974-cü il iyunun 28-də Şəmkir rayonunun Qaralar kəndində anadan olub. 1989-cu ildə orta məktəbi bitirdikdən sonra Gəncə şəhərindəki peşə məktəbində elektrik qaynaqçısı peşəsinə yiyələnib. 1993-cü ildə Milli Ordu sıralarına çağırılıb. Qusar rayonunda hərbi təlim keçdikdən sonra döyüş bölgəsinə göndərilib. Döyüş yolu Tərtərdən başlayan Zaur sonralar Füzuli, Ağdam, Kəlbəcər və Murovdağa qədər gedib çıxıb. 1994-cü ildə Murovdağ istiqamətində kəşfiyyata çıxarkən mühasirəyə düşməsinə baxmayaraq, cəsurluğu nəticəsində 13 gündən sonra geri qayıdıb. Bir müddət müalicə aldıqdan sonra yenidən cəbhəyə yollanıb. Daha sonra 776 nömrəli hərbi hissədə xidmətə başlayıb. O, komandirlərinin tapşırıqlarını ləyaqətlə yerinə yetirib. Müstəqilliyimizin qorunub saxlanılmasında Milli Ordunun əsgəri kimi həmişə özünü şərəflə doğruldub.

Z.Sarıyev 1995-ci ilin martında dövlət çevrilişinə cəhdin qarşısı alınan zaman silahlı dəstə ilə üz-üzə gələrkən qəhrəmancasına həlak olub.

Azərbaycan Respublikası Prezidentinin 4 aprel 1995-ci il tarixli 307 nömrəli Fərmanı ilə Sarıyev Zaur Rəşid oğlu ölümündən sonra Azərbaycanın Milli Qəhrəmanı adına layiq görülüb.

Şəmkir rayonundakı Şəhidlər xiyabanında dəfn olunub.

Sayadov Mehman Qəzənfər oğlu

1972-ci il noyabrın 21-də Qərbi Azərbaycanın Vardenis rayonunun Günəş kəndində anadan olub. Yeddinci sinfə kimi doğma kəndlərində oxuyub. Sonra məlum səbəblərdən ailələri ilə birlikdə Samux rayonuna gəlib. Sovet ordusu sıralarına hərbi xidmətə çağırılan Mehman 6 ay Sverdlovskidə xidmət etdikdən sonra Vətənə qayıdıb. 1992-ci ildə "Azərbaycan bayrağı" könüllü müdafiə batalyonuna üzv yazılaraq Qarabağa - cəbhə bölgəsinə yollanıb. Bu o vaxtlar idi ki, ölkədə baş verən hərc-mərclikdən, siyasi qarışıqlıqlardan, vahid komandanlığın olmamasından, vətən xainlərinin ucbatından Azərbaycanın dilbər guşələri bir-bir erməni işğalçılarının caynağına keçirdi. Mehman Şuşa döyüş bölgəsində erməni yaraqlılarına qarşı aparılan hərbi əməliyyatlarda mərdliklə döyüşüb. Şuşa şəhərinin bir sıra kəndlərinin müdafiəsində xüsusi qəhrəmanlıq nümayiş etdirib.

M.Sayadov 1992-ci il mayın 9-da Nəbilər kəndinin erməni faşistlərindən müdafiəsi zamanı qəhrəmancasına həlak olub.

Azərbaycan Respublikası Prezidentinin 7 iyun 1992-ci il tarixli 833 nömrəli Fərmanı ilə Sayadov Mehman Qəzənfər oğlu ölümündən sonra Azərbaycanın Milli Qəhrəmanı adına layiq görülüb.

Meyitini döyüş bölgəsindən götürmək mümkün olmayıb.

Sədiyev Vəzir İsa oğlu

1961-ci il iyunun 6-da Gürcüstan Respublikasının Marneuli rayonunun Aşağı Qullar kəndində anadan olub. Orta təhsilini Qərbi Azərbaycanın Körpülü kəndində başa çatdırdıqdan sonra Tbilisi Ali Hərbi Artilleriya Məktəbinə daxil olub. Məktəbi bitirdikdən sonra Rusiyanın Qorki şəhərindəki hərbi məktəbə müəllim təyin edilib. Sonra könüllü olaraq Əfqanıstana yola düşüb. Əfqanıstan müharibəsində iştirak etdikdən sonra mayor rütbəsi ilə qərargah rəisinin müavini təyin edilib. Xocalı soyqırımı başlayanda Azərbaycana gələrək Artilleriya və Hərbi Hava Qüvvələri İdarəsində döyüş hazırlığı şöbəsinin rəis müavini vəzifəsində çalışıb. Vəzir Laçın, Qubadlı, Füzuli və Ağdərə rayonlarında erməni işğalçılarına qarşı gedən döyüşlərdə iştirak edərək xüsusi qəhrəmanlıq nümayiş etdirib.

V.Sədiyev 1993-cü il fevralın 19-da Ağdərənin Aterk kəndi uğrunda gedən döyüşdə qəhrəmancasına həlak olub.

Ailəli idi. Bir övladı var.

Azərbaycan Respublikası Prezidentinin 15 yanvar 1995-ci il tarixli 262 nömrəli Fərmanı ilə Sədiyev Vəzir İsa oğlu ölümündən sonra Azərbaycanın Milli Qəhrəmanı adına layiq görülüb.

Bakı şəhərində Şəhidlər xiyabanında dəfn olunub.

Milli Qəhrəmanlar Beynəlxalq İnformasiya Mərkəzinin materialları əsasında hazırladı:

Ədalət DAŞDƏMİRLİ

Azərbaycan müəllimi.- 2011.- 18 fevral.- S.22.