"Tənqid və ədəbi proses"

Tanınmış tənqidçi, ədəbiyyatşünas alim Əhəd Hüseynovun vəfatından sonra onun "Tənqid və ədəbi proses" kitabı işıq üzü görüb. Alimin qızı - ADPU-nun Azərbaycan və dünya ədəbiyyatı tarixi kafedrasının əməkdaşı Zərnurə Əhədqızı tərəfindən tərtib olunan kitab "Nurlan" nəşriyyatı tərəfindən çap olunub. Kitabda Azərbaycan ədəbi-tənqidinin istedadlı və nüfuzlu nümayəndələrindən biri kimi tanınan Əhəd Hüseynovun ədəbi-tənqidi məqalələri toplanıb.

Nəsr, poeziya, tənqid və ədəbiyyatşünaslıq məsələlərinə həsr edilmiş bu məqalələr 1950-1970-ci illər ədəbi prosesinin bütün mürəkkəbliyi, ziddiyyətləri, inkişaf spesifikası, sosioloji və estetik təmayülləri haqqında aydın təsəvvür yaradır.

Kitabda müəllifin M.Füzulinin alleqorik əsərlərinin ideya - estetik xüsusiyyətlərindən bəhs edən "Füzulinin təmsilləri" adlı araşdırması və əsərlərinin biblioqrafiyası da yer almışdır.

Ümidvarıq ki, "Tənqid və ədəbi proses" kitabı filoloqlar və pedaqoji ictimaiyyət tərəfindən maraqla qarşılanacaq.

Şakir CƏFƏROV

Azərbaycan müəllimi.- 2011.- 18 fevral.- S.23.