İndoneziyada da Xocalı faciəsi qurbanlarının xatirəsi anılıb

Azərbaycanın İndoneziyadakı səfirliyindən AzərTAc-a bildirmişlər ki, bu ölkənin Kharisma Bangsa Qlobal Təhsil Mərkəzində Xocalı soyqırımının 19-cu ildönümü ilə bağlı tədbir keçirilmişdir.

Əvvəlcə tədbir iştirakçıları Azərbaycanın Xarici İşlər Nazirliyindən, "Xocalıya ədalət" kampaniyasının təşkilat komitəsindən göndərilmiş fotolardan, Ermənistan-Azərbaycan, Dağlıq Qarabağ münaqişəsinə, Xocalı soyqırımına dair kitab və nəşrlərdən ibarət sərgiyə baxmışlar. Ölkəmizin İndoneziyadakı səfiri İbrahim Hacıyev Xocalı soyqırımı, eləcə də Ermənistan-Azərbaycan, Dağlıq Qarabağ münaqişəsi barədə ətraflı məlumat vermişdir. Diplomat Ermənistanın hərbi təcavüzü nəticəsində torpaqlarımızın 20 faizinin işğal olunduğunu, bir milyondan artıq azərbaycanlının qaçqın və məcburi köçkünə çevrildiyini, bu ərazilərdə tarixi və mədəniyyət abidələrinin, məktəblərin, səhiyyə ocaqlarının, kitabxanaların məhv edildiyini diqqətə çatdırmışdır.

Tədbirdə İslam Konfransı Gənclər Forumunun mədəniyyətlərarası dialoq üzrə baş əlaqələndiricisi, Heydər Əliyev Fondunun vitse-prezidenti Leyla xanım Əliyevanın təşəbbüsü ilə həyata keçirilən "Xocalıya ədalət" kampaniyası haqqında da ətraflı məlumat verilmişdir. Beynəlxalq kampaniyanın www.justiceforkhojaly.org İnternet saytının, eləcə də burada yerləşdirilmiş ABŞ Prezidenti və Konqresi, Avropa Komissiyasının sədri, Avropa Parlamenti, İKT-yə üzv ölkələrin parlamentlərinə ünvanlanmış Xocalı soyqırımının insanlığa qarşı cinayət kimi tanınması ilə bağlı müraciətin təqdimatları keçirilmiş, tədbir iştirakçıları bu müraciətə qoşulmağa dəvət olunmuşlar. Mərkəzin professor-müəllim heyətinin, tələbələrin, KİV nümayəndələrinin iştirak etdikləri tədbirdə "Xocalı genosidi" filmi də göstərilmişdir.

Sonda səfirlik tərəfindən nəşr edilmiş Ermənistan-Azərbaycan, Dağlıq Qarabağ münaqişəsi haqqında kitablar, diplomatik nümayəndəliyimizin hazırladığı "Xocalıya ədalət" süarı və kampaniyanın İnternet ünvanı ilə köynəklər və döş nişanları, müxtəlif beynəlxalq təşkilatların Xocalı soyqırımı ilə bağlı qətnamələr toplusu iştirakçılara təqdim olunmuşdur.

Azərbaycan müəllimi.- 2011.- 25 fevral.- S.1.