Magistrantların XI Respublika konfransı

On bir illik salnaməsi bir sıra uğurla seçilən Sumqayıt Dövlət Universitetində may ayının 25-də Azərbaycan üzrə magistrantların XI elmi konfransı keçirilmişdir. Tədbir iştirakçıları konfransdan əvvəl ümummilli lider Heydər Əliyevin ali məktəbin foyesində qoyulmuş büstü önünə əklil qoymuşlar.

Sonra elmi məclis böyük akt zalında öz işinə başlamış, ali məktəbin rektoru, fizika-riyaziyyat elmləri doktoru, professor Nadir Qəhrəmanov tədbiri açaraq universitet haqqında qısa məlumat vermişdir. Azərbaycan Respublikasının dünya miqyasında tanınması və bütün sahələrdə çiçəklənməsində böyük rolu olmuş ulu öndərin xatirəsi bir dəqiqəlik sükutla yad edilən konfransda daha sonra tədbirin təşkili məqsədi aydınlaşdırılmışdır.

Azərbaycanın gələcək elmi potensialını təşkil edəcək gənclərin araşdırmalarının nəticələrini geniş miqyasda yaymaq, elmi işləri əlaqələndirmək və düzgün istiqamətləndirmək, görülən işlərin nəticələrini ümumiləşdirmək başlıca niyyətdir. Ali məktəbin bu sahədəki təcrübəsini nəzərə alan Təhsil Nazirliyi konfransa təqdim olunan elmi məqalələrin nəşri üçün universitetdə beynəlxalq kodlu jurnalın çapına icazə vermişdir.

Builki elmi konfransda ayrı-ayrı ali məktəblərin fəal iştirakı nəzərə çatdırılmışdır. Belə ki, Bakı Slavyan Universitetinin 70 nəfər magistrantı tədbirə qatılmışdır. ADNA-nın 59, ADPU-nun 57, GDU-nun 40, Az.TU-nun və BDU-nun hər birindən 30 nəfər gənc tədqiqatçı konfransda iştirak etmişdir.

Geniş tərkibdə təşkilat komitəsində təmsil olunan alimlərin iştirakı ilə keçirilən elmi məclisin plenar iclasında Azərbaycan Respublikasının Dövlət himni səsləndirildikdən sonra ADNA-nın magistrantı Vüsalə Məmmədova, BSU-nun magistrantı Pərvin Eyvazov, NDU-nun magistrantı Nurlan Fətəliyev və başqaları çıxış etmişlər. Plenar iclasdan sonra elmi konfrans fizika, riyaziyyat, mexanika-energetika, ümumi informasiya texnologiyaları, biologiya və coğrafiya, Azərbaycan tarixi, dilçilik, ədəbiyyatşünaslıq, metodika, pedaqogika və s. (ümumilikdə 14) bölmədə öz fəaliyyətini davam etdirmişdir. 2 gün ərzində bölmə rəhbərlərinin nəzarəti altında çoxlu sayda çıxışlar dinlənilmiş, maraqlı mövzular ətrafında müzakirələr aparılmışdır.

Mayın 27-də elmi konfransın yekun iclası olmuşdur. Bölmə rəhbərləri 2 günlük müzakirələr və ən yaxşı çıxışlar barədə hesabat vermişlər.

SDU-nun elmi işlər üzrə prorektoru, fizika-riyaziyyat elmləri doktoru, professor Yadigar Hüseynov hesabatlar əsasında ümumiləşdirmə aparmış, ən uğurlu çıxışlarına görə ayrı-ayrı magistrantları təbrik etmişdir.

Qeyd olunmuşdur ki, konfransa göndərilmiş 638 magistrant tezisləri ayrıca kitab halında nəşr olunacaqdır.

Azərbaycan müəllimi.- 2011.- 3 iyun.- S.3.