Tələbələrin XVI Respublika fənn olimpiadası

Mayın 27-də Azərbaycan Dövlət İqtisad Universitetində Təhsil Nazirliyi və Azərbaycan Təhsil İşçiləri Azad Həmkarlar İttifaqı Respublika Komitəsinin birgə təşkilatçılığı ilə keçirilən tələbələrin XVI Respublika fənn olimpiadasının açılış mərasimi oldu.

Tədbiri təhsil naziri Misir Mərdanov açaraq hamını burada görməkdən məmnunluq hissi keçirdiyini söylədi. Nazir tələbələrin respublika fənn olimpiadasının ölkəmizin ali məktəblərində təhsil alan tələbələrin müxtəlif fənlərə marağının artırılmasına, həmçinin həmin fənlər üzrə onların hazırlıq səviyyəsinin nümayiş etdirilməsinə imkan və şərait yaratdığını, istedadlı gənclərin aşkara çıxarılmasında müstəsna əhəmiyyət daşıdığını bildirdi.

Tələbələrin fənn olimpiadasına böyük maraq göstərdiyini və ildən-ilə bilik yarışında iştirak etmək istəyənlərin sayının artdığını deyən nazir bununla bağlı statistik rəqəmləri diqqətə çatdırdı. Məlumat üçün bildirdi ki, olimpiada iştirakçıları 12 fənn üzrə (riyaziyyat, fizika, kimya, biologiya, informatika, Azərbaycan dili, Azərbaycan tarixi, Azərbaycan coğrafiyası, ingilis dili, fransız dili, alman dili və rus dili) öz biliklərini nümayiş etdirəcəklər. Olimpiada ənənəvi olaraq 2 turda təşkil edilib. I tur bu ilin aprelində ali təhsil müəssisələrində keçirilib və burada 2000-ə yaxın tələbə iştirak edib. Olimpiadanın yekun turunda 28 dövlət və 8 qeyri-dövlət ali təhsil müəssisəsindən 684 tələbə iştirak etmək hüququ qazanıb. Bilik yarışına Bakı şəhərində yerləşən ali təhsil müəssisələri ilə yanaşı, Sumqayıt, Naxçıvan, Gəncə, Mingəçevir, Lənkəran və respublikamızın digər şəhərlərində fəaliyyət göstərən ali təhsil ocaqları da qatılıb.

Təhsil naziri son illər ölkəmizdə gənclərin yüksək bilik və təhsil almaları üçün hər cür şərait yaradıldığını söyləyərək ölkə başçısı cənab İlham Əliyev tərəfindən xüsusi istedada malik uşaq və gənclərin yaradıcılıq potensialının inkişafı istiqamətində görülən işləri diqqətə çatdırdı. Azərbaycanda kifayət qədər istedadlı gənclərin olduğunu bildirən nazir Misir Mərdanov hazırda çoxlu sayda azərbaycanlı tələbənin xarici ölkələrin nüfuzlu ali məktəblərində uğurla təhsil aldığını qeyd etdi. Ölkəmizdə gənclər siyasətinin dövlətin prioritet istiqamətlərindən biri olduğunu, cəmiyyətin ictimai-siyasi, sosial-iqtisadi və mədəni həyatında gənclərimizin fəal iştirak etdiyini söyləyən nazir olimpiada iştirakçıları olan tələbələrə bir sıra tövsiyələr verdi, onlara uğurlar arzuladı.

Nazir Misir Mərdanov tələbələrin fənn olimpiadasının münsiflər heyətində respublikamızın tanınmış alim və pedaqoqlarının təmsil olunduqlarını deyərək onların adlarını çəkdi və bütövlükdə bilik yarışının keçirilməsində əməyi olanlara təşəkkürünü bildirdi.

Çıxış üçün söz alan Gəncə Dövlət Universitetinin rektoru Elman Məmmədov ölkəmizdə təhsilin uğurla inkişaf etməsindən, belə olimpiadaların bilikli və yüksək intellektə malik gənclərin üzə çıxarılmasında mühüm rol oynamasından, Azərbaycan Təhsil İşçiləri Azad Həmkarlar İttifaqı Respublika Komitəsi sədrinin müavini Şaiq Əsgərov təmsil etdiyi qurumla Təhsil Nazirliyi arasında qurulmuş əməkdaşlıqdan, birgə həyata keçirilən tədbirlərdən danışdılar.

Sonra təhsil nazirinin müavini İradə Hüseynova təşkilati məsələlərlə bağlı geniş məlumat verdi. Nazir müavini müxtəlif səpgidə olimpiadaların, bilik yarışlarının, müsabiqələrin həyata keçirilməsinə təhsil nazirinin hər zaman dəstək olduğunu, onlara yüksək diqqət və qayğı ilə yanaşdığını bildirərək nazir Misir Mərdanova minnətdarlıq etdi. Çıxışının sonunda İradə Hüseynova olimpiada iştirakçılarına müvəffəqiyyətlər dilədi.

Digər çıxış edənlərdən Bakı Dövlət Universitetinin professoru Məcnun Babayev, Bakı Slavyan Universitetinin prorektoru Məmməd Əliyev tələbələrin fənn olimpiadasının keçirilməsinin əhəmiyyətinə toxunaraq, gənclərə ən xoş istəklərini çatdırdılar.

Mərasimdə olimpiada iştirakçısı olan tələbələr də çıxış edərək ölkə başçısı cənab İlham Əliyev tərəfindən gənclərə göstərilən diqqət və qayğıdan söz açdılar. Gənclər olimpiadanın keçirilməsində zəhməti olan bütün şəxslərə minnətdarlıqlarını bildirdilər.

Elə həmin gün respublikanın 36 ali məktəbindən 684 tələbə 12 fəndən öz bilik və bacarığını nümayiş etdirdi.

Onu da qeyd edək ki, olimpiadanın qaliblərinə Azərbaycan Respublikası Təhsil Nazirliyi və Azərbaycan Təhsil İşçiləri Azad Həmkarlar İttifaqı Respublika Komitəsi tərəfindən diplomlar, hədiyyələr və pul mükafatları təqdim olunacaqdır.

Samirə KƏRİMOVA

Azərbaycan müəllimi.- 2011.- 3 iyun.- S.2.