Sərgidə
500-dən çox əl
işi nümayiş olunub
Martın 3-də Azərbaycan Dillər Universitetinin İnformasiya Resurs Kompleksində 8 Mart Beynəlxalq Qadınlar Günü və Novruz bayramı münasibətilə ənənəvi əl işləri sərgisi keçirildi. Sərgidə xanımların biçmə-tikmə, toxuma, rəsm, karikatura nümunələri, dizayner Xanım Məmmədovanın hazırladığı Azərbaycanın müxtəlif regionlarına aid milli geyimlər, xalçaçılıq sənətini nümayiş etdirən əsərlər, yağlı boya ilə çəkilmiş rəsm əsərləri, milli üslubda bəzədilmiş gəlinciklər, pannolar, təbii güllərdən hazırlanan kompozisiyalar, muncuq və qiymətli daş-qaşlarla hazırlanmış qadın bəzək əşyaları məmulatlarından ibarət 500-dən çox əl işi nümayiş olundu. Bununla yanaşı, sərgi iştirakçılarına ilk dəfə olaraq yalnız kağız məmulatlarından hazırlanan əl işləri də təqdim olundu.
Qeyd olundu
ki, tədbirin keçirilməsində əsas məqsəd milli dəyərlərin saxlanılması və qorunması,
istedadlı insanların aşkar edilməsi,
onlar arasında əlaqə yaratmaq və mədəni irsin xarici ölkələrdə
tanıdılmasıdır.
Sərgidə
çıxış edən ADU-nun rektoru, millət vəkili,
professor Səməd Seyidov sərgi
iştirakçılarını 8 Mart Beynəlxalq Qadınlar
Günü və Novruz bayramı münasibətilə təbrik
etdi. S.Seyidov sərginin əhəmiyyətinə,
eləcə də qadınların cəmiyyətdə
roluna toxundu: "Əl işləri
sərgisinin keçirilməsi mühüm əhəmiyyət
daşıyır. Belə sərgilərin
keçirilməsi Azərbaycan mədəniyyətinin təbliğ
edilməsi baxımından önəmlidir. Azərbaycan
qadınının milli mənəvi dəyərlər
sistemimizin təşəkkülündə və
yaşadılmasında müstəsna rolu vardır".
Millət
vəkili Asim Mollazadə isə çıxışında
ADU-nun milli dəyərlərimizin dünyaya
tanıdılmasında rolundan danışdı.
Sərginin
əsas təşkilatçılarından olan ADU-nun Türk
Folklor Mərkəzinin direktoru Rəna Salehova sərgidə
müxtəlif məmulatlardan hazırlanmış əl
işlərinin nümayiş olunduğunu vurğuladı.
Regionşünaslıq
kafedrasının müdiri Sevdagül Əliyeva isə "Azərbaycan
milli geyimləri" adlı təqdimatla
çıxış etdi. O, təqdimatda
müxtəlif dövrlərdə istifadə olunan və bu
gün də öz aktuallığını saxlayan milli geyim
növlərindən geniş bəhs etdi.
Sərgiyə
gələnlər Regionşünaslıq kafedrasının təşkilatçılığı ilə tələbələr tərəfindən
hazırlanan "Xına gecəsi" adlı bədii
kompozisiyaya tamaşa etdilər.
Kompozisiyada Azərbaycanda evlilik və
toy adət-ənənələri nümayiş olundu.
Qeyd
edək ki, sərgidə beynəlxalq təşkilatların, səfirliklərin,
QHT-lərin nümayəndələri və ADU-nun
professor-müəllim heyəti
iştirak edirdi.
Xatırladaq
ki, əl işləri sərgisi son iki ildə sayca
dördüncü dəfədir ki, keçirilir. İlk belə
sərgi 2009-cu il martın 5-də reallaşıb.
Azərbaycan
müəllimi.- 2011.- 4 mart.- S.15.