Almaniyalı professor ADU-da seminar keçir

Azərbaycan Dillər Universitetinin İctimaiyyətlə əlaqələr və mətbuat xidmətinin rəhbəri Zeynab Kazımovadan aldığımız məlumata görə, fevralın 26-da alman dili fakültəsinin müəllimlərinin təkmilləşmə seminarlarına start verilib. Seminarları Almaniyanın Heydelberq Universitetinin professoru Robert Şmitt-Brandt aparır. "Xarici dilin tədrisinin ilkin metodları", "Öyrənmə dəyişkənliyi", "Universal öyrənmə (beyin mərkəzləri)", "İnsanlarda dilin inkişafı", "Uşaqlarda dilin inkişafı prosesi (ilkin dil bacarıqları)", "Yetkin insanlarda dilin inkişafı (ikinci dil bacarıqları)", "Xarici dilin tədrisinin müasir metodları", "Tərcümə və tərcümə prosesi", "Standart dillər və dialektlər", "Ölkəşünaslıq", "Dil və yazı" və "Dil, ruh və mədəniyyət" mövzularını əhatə edən alman dili müəllimlərinin təkmilləşmə seminarları 12 həftə davam edəcək. Seminarlara alman dili fakültəsinin 10 müəllimi qatılıb.

Alman dili fakültəsinin dekanı, dosent Ulduz Aslanovanın da iştirak etdiyi ilk seminarda Heydelberq Universitetinin professoru Robert Şmitt-Brandt dünyada mövcud olan dil ailələrindən, dillərin yaranma prosesindən, inkişafından və xüsusiyyətlərindən danışdı.

Seminarın sonunda almaniyali professor müəllimləri maraqlandıran sualları cavablandırdı.

Onu da qeyd edək ki, Robert Şmitt-Brandt ADU-nun alman dili fakültəsində əsas fənn müəllimi kimi çalışacaq. Belə ki, professor IV kursda təhsil alan tələbələrə əsas dil fənnindən bir semestr ərzində dərs deyəcək.

Şakir CƏFƏROV

Azərbaycan müəllimi.- 2011.- 4 mart.- S.7.