Lənkəran Dövlət Universitetində konfrans keçirilib

Lənkəran Dövlət Universitetində "Cənub bölgəsinin inkişafında əmək və təbii ehtiyatlardan səmərəli istifadə" mövzusunda konfrans keçirilib. Rayon ictimaiyyəti nümayəndələri, yerli sahibkar və iş adamlarının iştirak etdikləri tədbiri universitetin rektoru, əməkdar elm xadimi, fizika-riyaziyyat elmləri doktoru, professor Asəf İsgəndərov açaraq Azərbaycanın bölgədə lider dövlətə çevrilməsində, iqtisadi cəhətdən güclü, siyasi baxımdan müstəqil ölkə səviyyəsinə çıxmasında və beynəlxalq miqyasda nüfuzunun artmasında ümummilli lider Heydər Əliyevin müstəsna xidmətlərindən, Prezident İlham Əliyevin ulu öndərin bütün sahələrdə həyata keçirdiyi islahatları uğurla davam etdirməsindən danışıb. Daha sonra rektor ölkədə aparılan təhsil islahatlarından söz açaraq, Azərbaycan elmi və təhsilinin özünün yeni inkişaf mərhələsinə daxil olduğunu bildirib.

Konfransda çıxış edən Milli Məclisin deputatı Rüfət Quliyev bildirdi ki, Azərbaycan Respublikası regionlarının sosial-iqtisadi inkişafı Dövlət Proqramı ölkəmizin hər yerində olduğu kimi, Lənkəranda da müvəffəqiyyətlə həyata keçirilir, aparılan islahatlar sürətlənib, özəl və ictimai təşkilatların fəaliyyəti genişlənib.

Millət vəkili gənc sahibkarlara diqqət və qayğının daha da artırılmasının vacibliyini qeyd etdi və bildirdi ki, gənc sahibkarlarla işi yaxşılaşdırmaq üçün Lənkəran Şəhər İcra Hakimiyyəti ilə birlikdə yeni layihələrin həyata keçirilməsinə başlanıb. Həmin layihələr konfrans iştirakçıları ilə birgə müzakirə edildi.

Konfransda 2011-ci ilin "Turizm ili" olduğu və bununla əlaqədar qarşıya yeni vəzifələr qoyulduğu qeyd edildi. Bildirildi ki, Lənkəranda turizm, xususilə ekoturizm inkişaf etdiriləcək. Lənkəran Dövlət Universitetində tələbə və məzunların turizm, hotelçilik və restoran xidməti sahəsində ixtisasartırma və yenidənhazırlanması kursları açılacaq.

Həmin gün universitetdə əmək yarmarkası keçirildi. Lənkəran əmək məşğulluğu idarəsi ilə keçirilən tədbirdə universitetin tələbələri iştirak edirdilər.

Hacı Etibar ƏHƏDOV

Azərbaycan müəllimi.- 2011.- 4 mart.- S.7.