"Məktəb-ailə münasibətlərinin aktual problemləri"

Zərdabda "Təhsil haqqında" Azərbaycan Respublikası Qanununun tələbləri baxımından "Məktəb-ailə münasibətlərinin aktual problemləri" mövzusunda konfrans keçirilmişdir.

Tədbirdə məktəb direktorları, onların təşkilati işlər üzrə müavinləri, gənc müəllimlər, şagirdlər, uşaq təşkilatlarının, yerli icra və bələdiyyə orqanlarının, əlaqədar təşkilatların, hüquq-mühafizə orqanlarının rəhbərləri iştirak etmişlər.

AzərTAc xəbər verir ki, konfransda "Məktəb-ailə münasibətlərinin aktual problemləri", "Uşaq hüquqları" haqqında Azərbaycan Respublikası Qanununun tələbləri baxımından uşaqların sağlamlığının qorunması sahəsində həyata keçirilən profilaktik tədbirlərin vəziyyəti haqqında", "Məktəb-ailə münasibətlərinin düzgün qurulmasında məktəb valideyn komitəsinin rolu", "Məktəb-ailə münasibətlərinin yaxşılaşdırılmasında məktəbdənkənar tədbirlərin əhəmiyyəti", "Uşaqlar və gənclər arasında hüquqpozma və cinayətkarlıq hallarının vəziyyəti və bunun qarşısının alınmasında ailənin və məktəbin rolu" mövzularında məruzələr dinlənilmişdir.

Konfransa yekun vuran rayon icra hakimiyyətinin başçısı Lütvəli Babayev rayonda təhsil sahəsində son illər qazanılan uğurları, ali məktəblərə qəbuldakı irəliləyişləri, o cümlədən təkcə ötən il 3 nəfərin 600-dən çox bal toplamasını, 1 nəfərin Prezident təqaüdünə layiq görülməsini, son 3 ildə 5 yeni məktəbin tikilməsini, 9 məktəbin istilik sisteminin bərpa olunmasını və digər məsələləri qeyd etmiş, yol verilmiş nöqsanlardan söz açmışdır.

Konfransın yekunları ilə bağlı tədbirlər planının hazırlanması tövsiyə olunmuşdur.

Azərbaycan müəllimi.- 2011.- 11 mart.- S.7.