Bakıda iki uşaq bağçasının açılışı olub

Martın 16-da Bakının Nəsimi rayonundakı 76 nömrəli körpələr evi-uşaq bağçasının əsaslı təmirdən sonra açılış mərasimi oldu. Təhsil naziri Misir Mərdanov Novruz bayramı ərəfəsində açılış münasibətilə bağçanın pedaqoji kollektivini təbrik etdi. Respublikada görülən bütün bu işlərin ölkə başçısı İlham Əliyevin təhsilə göstərdiyi diqqət və qayğısı nəticəsində mümkün olduğunu bildirdi. Sonra nazir Misir Mərdanov, Nəsimi Rayon İcra Hakimiyyətinin başçısı Nəsib Məhəməliyev, Bakı Şəhəri üzrə Təhsil İdarəsinin müdiri Nailə Rzaquliyeva və digər rəsmi şəxslər bağçanın məktəbə hazırlıq, musiqi, yataq, kompüter otaqlarına baxdılar, görülmüş işlərdən razılıq ifadə olundu.

Həmin gün Bakının Xətai rayonunda da 288 nömrəli körpələr evi-uşaq bağçasının əsaslı təmirdən sonra açılışı oldu. Təhsil naziri Misir Mərdanov uşaqları və onların valideynlərini Novruz bayramı münasibətilə təbrik etdi. Sonra nazir bağçanın bütün otaqlarını gəzdi və onun təmirində zəhməti olan adamların əməyini yüksək qiymətləndirdi.

Şakir CƏFƏROV

Azərbaycan müəllimi.- 2011.- 18 mart.- S.6.