Tələbə rəssamın fərdi rəsm sərgisi

Naxçıvan Dövlət Universitetində incəsənət fakültəsinin təsviri incəsənət ixtisası üzrə IV kurs tələbəsi Pərviz Yəhyayevin fərdi rəsm sərgisi açılıb. 10 gün davam edəcək sərgidə tələbə rəssamın təsviri sənətin müxtəlif janrlarında çəkdiyi əsərlər nümayiş olunacaq.

Sərginin açılışında çıxış edən ali təhsil ocağının rektoru, akademik İsa Həbibbəyli qeyd edib ki, əsası Bəhruz Kəngərli tərəfindən qoyulan Naxçıvan rəssamlıq məktəbinin bu gün davam etdirilməsi ilə yanaşı, onun sıraları daima yeni nəsil rəssamları ilə zənginləşməkdədir. Rektor, gənc rəssamın formalaşmasında onun müəllimi, Naxçıvan Muxtar Respublikasının əməkdar rəssamı Cavid İsmayılovun xidmətlərini xüsusilə vurğulayıb.

Xalq rəssamı, universitetin müəllimi Hüseynqulu Əliyev çıxışında ölkədə elmin, təhsilin, mədəniyyət və incəsənətin inkişafına göstərilən diqqət və qayğıdan danışıb.

Əməkdar rəssam Cavid İsmayılov böyük sənətdə ilk addımlarını atan tələbə rəssama daha böyük nailiyyətlər diləyib. Tələbə yoldaşlarından Nəsib Nəsirov da təbriklərə qoşulub.

Tədbir iştirakçıları rəssamın əsərlərinin əks olunduğu videomateriala baxıblar. Sonra sərgiyə baxış olub. Sərgidə üstünlük təşkil edən portret və peyzaj janrında çəkilən əsərlər düşündürücü olması ilə buraya gələnlərin böyük marağına səbəb olub.

Nərmin CƏFƏROVA

Azərbaycan müəllimi.- 2011.- 20 may.- S.15.