Təhsil naziri ümumtəhsil müəssisələrinin direktorları ilə müşavirə keçirdi

Mayın 19-da Bakıdakı 276 nömrəli tam orta məktəbdə ümumtəhsil müəssisələrindəki mövcud vəziyyətlə bağlı paytaxtın ümumtəhsil müəssisələrinin direktorları ilə müşavirə keçirildi.

Müşavirədə təhsil naziri Misir Mərdanov, nazirliyin Strateji təhlil, planlaşdırma və kadrların idarəolunması şöbəsinin müdiri Fərzəli Qədirov, Bakı Şəhəri üzrə Təhsil İdarəsinin müdiri Nailə Rzaquliyeva, idarənin məsul işçiləri və paytaxtın ümumtəhsil məktəblərinin, eləcə də Təhsil Nazirliyinin bilavasitə tabeliyində olan təhsil müəssisələrinin direktorları iştirak edirdilər.

Tədbiri təhsil naziri Misir Mərdanov açaraq başa vurmaqda olduğumuz tədris ili dövründə ümumi təhsillə bağlı xeyli işlərin görüldüyünü diqqətə çatdırdı.

Ölkəmizdə şəffaflığın artırılması və korrupsiyaya qarşı mübarizə tədbirlərinin daha da gücləndirildiyini qeyd edən nazir həmin məsələyə respublika Prezidenti cənab İlham Əliyev tərəfindən ciddi nəzarət olunduğunu xüsusi vurğuladı. Nazir bununla əlaqədar Təhsil Nazirliyinin də müvafiq işlər gördüyünü və baş verə biləcək neqativ halların aradan qaldırılması istiqamətində xüsusi tədbirlərin həyata keçirildiyini söylədi.

Bu gün bizim nümunəvi məktəblərimizin, gözəl təşkilatçılıq qabiliyyəti ilə seçilən təcrübəli məktəb direktorlarımızın, yüksək savada və intellektə malik, daim öz üzərində işləyən yaradıcı müəllimlərimizin olduğunu qeyd edən təhsil naziri onların Azərbaycan təhsilinə başucalığı gətirdiyini bildirdi. Nazir xüsusilə Bakı Avropa Liseyinin, "Zəngi" liseyinin, akademik Zərifə Əliyeva adına tam orta məktəbin adlarını çəkərək həmin təhsil müəssisələrinin əldə etdikləri uğurlardan danışdı. Belə təhsil ocaqlarının sayının artmasını arzuladı.

Təhsil naziri onu da qeyd etdi ki, hansı təhsil müəssisəsinin rəhbərində işləmək arzusu varsa, ən başlıcası, o ümumi mənafeyi şəxsi mənafedən üstün tuta bilirsə, yüksək təşkilatçılıq qabiliyyətinə malikdirsə, orada uğur da olur, müsbət nəticə də üstünlük təşkil edir. Nazir direktorlara məhz bunu arzu etdi.

Ümumi orta təhsil sahəsində qazanılan nailiyyətlərlə yanaşı, bəzi problem və nöqsanların da olduğunu istisna etməyən nazir Misir Mərdanov bunu təəssüf hissi ilə qarşıladığını, baş verən neqativ hallarla bağlı ciddi narahatçılıq keçirdiyini bildirdi.

Nazir Bakı şəhərinin ümumtəhsil müəssisələri ilə əlaqədar 2011-ci ilin yanvar - may aylarında Təhsil Nazirliyinin "Qaynar xətt" xidmətinə daxil olan müraciətlər haqqında məlumat verdi. Adıçəkilən xidmətə 127 məktəbdə neqativ hallar barədə 223 müraciətin daxil olduğunu qeyd edən təhsil naziri bəzi xoşagəlməz faktları söylədi, adları qeyd olunan ümumtəhsil müəssisələrindəki mövcud vəziyyətlə bağlı öz iradlarını bildirdi. Nazir Misir Mərdanov direktorlara ciddi xəbərdarlıq etdi ki, göstərilən nöqsanları qısa müddət ərzində aradan qaldırsınlar və müşavirədə söylənilənlərdən nəticə çıxarsınlar. Nazir vətəndaşların şikayət etdikləri ümumtəhsil məktəbləri direktorlarına kəskin narazılığını bildirərək onlara rəhbərlik etdikləri təhsil müəssisələrində nöqsan və çatışmazlıqların qısa müddət ərzində aradan qaldırılması ilə bağlı konkret göstərişlərini verdi.

Çıxışında bəzi məsələlərə də ətraflı toxunan təhsil naziri bununla bağlı fikir və mülahizələrini söylədi.

Müşavirənin sonunda nazir Misir Mərdanov Bakı Şəhəri üzrəTəhsil İdarəsinin rəhbərliyinə idarənin əməkdaşlarının Bakıdakı ümumtəhsil müəssisələrində olmaları, baş verə biləcək neqativ halların vaxtında aradan qaldırılması, məktəblə valideyn arasında əlaqəni təmin etmək, şagirdlərlə səmimi ünsiyyət qurmaq və digər məsələlərlə bağlı tapşırıqlarını verdi.

Samirə KƏRİMOVA

Azərbaycan müəllimi.- 2011.- 20 may.- S.4.