Vətənə layiqli vətəndaş kimi tərbiyə olunuruq

Mən Bakıdakı 7 nömrəli orta məktəbin 11-ci sinif şagirdiyəm. Hərdən fikirləşəndə ki, artıq məktəbi bitirirəm və bir daha şagird kimi məktəbə qədəm qoya bilməyəcəm, bu məni kədərləndirir. Çünki uşaqlığımızı, gəncliyimizi həsr etdiyimiz bu doğma ocaq bizə çox şey öyrətmiş, gələcəkdə necə addımlamağı, vətənə, dövlətə sadiq bir vətəndaş kimi yetişməyimizi aşılamışdır. Bu gün təhsil aldığım məktəb haqqındakı hisslərimi qələmə almağı düşündüm və bu yazıda buna nail olmağa çalışmışam.

İlk dəfə 7 nömrəli məktəbə qədəm qoyanda hiss elədim ki, bu təhsil ocağının özünəməxsus ab-havası var. Belə ki, istər şagirdlərdə, istərsə də müəllimlərdə xüsusi ciddilik və nizam-intizam mövcud idi. Bununla yanaşı məktəbimizdə hər zaman birinci şagirdi dinləmək və şagirdlərin daxilini üzə çıxarmaq kimi məsələləri müəllimlər diqqətdə saxlayırlar. Məktəbimizin zəngin maddi-texniki bazası var ki, bu da bizə dərslərimizi günün tələbləri səviyyəsində qurmağa kömək edir. Şagirdlər siniflərdə kompüter və proyektorlardan səmərəli istifadə edirlər. Məktəbimiz Heydər Əliyev Fondu tərəfindən əsaslı təmir edilib və pilot məktəbdir. 2009-cu ildə İnnovativ məktəblər layihəsinin qalibi olmuş bu təhsil ocağı 30 ölkədən seçilən məktəblər sırasına daxildir. Məktəbimiz 61 ölkədən olan məktəblər şəbəkəsinə daxildir və ayda bir dəfə bu məktəblərlə İnternet vasitəsilə əlaqə yaradırıq. Şagirdlər bu günü səbirsizliklə gözləyirlər. Məktəbimizin beynəlxalq əlaqələri bizi çox sevindirir. Bu yaxınlarda Almaniyadan məktəbimizə qonaqlar gəlmişdi. Onlar şagirdlərimizi bu ilin noyabrında Almaniyada 27 Avropa ölkəsinin iştirakı ilə keçiriləcək olimpiadaya dəvət etdilər. Hazırda məktəbimiz bu olimpiadaya yüksək səviyyədə hazırlaşır.

Son illər ölkəmizdə aparılan geniş quruculuq işləri və xüsusən də doğma Bakımızın gündən-günə çiçəklənməsi hamı kimi məni də çox sevindirir. Möhtərəm Prezidentimiz İlham Əliyevin və Heydər Əliyev Fondunun prezidenti Mehriban xanım Əliyevanın misilsiz xidmətləri və səyi nəticəsində respublikamız inkişaf edir, Avropa ölkələrinə sürətlə inteqrasiya olunur. Prezidentimizin gənclərə xüsusi diqqəti və qayğısı bizləri gələcəkdə daha da məsuliyyətli olmağa sövq edir. Prezidentimiz cənab İlham Əliyev çıxışlarında qeyd edir ki, "Biz çox istəyirik ki, gənclərimiz həm peşəkar, həm bilikli, həm də Vətənə, dövlətə bağlı olsunlar, Vətəni sevsinlər. Haqlı olaraq fəxr etsinlər ki, onlar Azərbaycan vətəndaşlarıdır". Biz gənclər bu fikirlərdən böyük qürur hissi duyur və vətənə layiqli vətəndaş olmaq üçün əlimizdən gələni etməyə çalışırıq.

Məktəbimizin direktoru Gülnaz Mehdizadə və sinif rəhbərimiz Zinnun Zərbəliyev ən çətin məqamlarımızda belə bizə kömək edirlər və öz dəstəklərini əsirgəmirlər. Biz müəllimlərimizə hörmətlə yanaşırıq və daim çalışırıq ki, onların rəğbətini qazanaq. Çünki müəllim müqəddəsdir və ata-ana qədər bizlərə əzizdir. Müəllimlərimizdən Ziyafət müəllimin, Kubra müəllimin, Solmaz müəllimin adlarını xüsusilə qeyd etmək istəyərdim. Çünki onlar bizə necə şəxsiyyət olmağın sirrini dərindən öyrədiblər.

Sinif yoldaşlarımla səmimi münasibətlərimiz var. Tural, Nihat, Leyla, Kəmalə və Əzizlə daha çox vaxt keçirirəm. Biz bir yerə toplaşaraq gələcək planlarımız haqqında danışır, məktəb xatirələrindən söhbət açır, "son zəng" mərasimi barəsində düşünürük. Məktəbimiz hər il "son zəng"i maraqlı keçirir. Biz bu günü səbirsizliklə gözləyirik.

Əli ƏLİYEV,

Bakıdakı 7 nömrəli məktəbin

XI sinif şagirdi

Azərbaycan müəllimi.- 2011.- 20 may.- S.9.