Azərbaycan Texniki Universitetinin 60 illik yubileyi qeyd olundu

Noyabrın 23-də Akademik Milli Dram Teatrında Azərbaycan Texniki Universitetinin 60 illik yubileyinə həsr olunmuş təntənəli mərasim keçirildi. Tədbirdə Azərbaycan Respublikasının təhsil naziri Misir Mərdanov, millət vəkilləri, ali məktəblərin rektorları, Təhsil Nazirliyinin məsul əməkdaşları, tanınmış alimlər və ziyalılar, bir sıra idarə və təşkilatların nümayəndələri, universitetin professor-müəllim heyəti, tələbələr və KİV təmsilçiləri iştirak edirdilər.

Təhsil naziri Misir Mərdanov iştirakçıları salamlayaraq tədbiri açıq elan etdikdən sonra Azərbaycan Respublikasının Dövlət himni səsləndi.

Misir Mərdanov təhsil ocağının kollektivini, müəllimləri, tələbələri dövlət başçısı cənab İlham Əliyevin adından yubiley münasibətilə təbrik edərək onlara cansağlığı və gələcək fəaliyyətlərində uğurlar arzuladı.

Azərbaycan Respublikasının Prezidenti cənab İlham Əliyevin universitetin əməkdaşlarının mühəndis kadrların hazırlanması və texniki elmlərin inkişafındakı xidmətlərinə görə müxtəlif fəxri adlar, orden və medallarla təltif olunması ilə bağlı 4 noyabr 2011-ci il tarixli sərəncamlarını təhsil və elm sahəsinə göstərilən diqqətin növbəti təzahürü kimi dəyərləndirən nazir ölkənin bütün təhsil ictimaiyyəti adından dövlət başçısına minnətdarlığını bildirdi. Misir Mərdanov bunun təhsil ocağında çalışan hər bir kəsin əməyinə verilən yüksək qiymət olduğunu qeyd etdi və kollektivin bu şərəfə layiq fəaliyyət göstərməsinin, öz işinə daha məsuliyyətlə yanaşmasının zəruriliyini vurğuladı. Nazir universitetin əməkdaşlarından bir qrupunun Təhsil Nazirliyinin yüksək mükafatlarına layiq görüldüyünü diqqətə çatdırdı.

AzTU-nun rektoru Havar Məmmədov yubiley mərasiminin iştirakçılarını salamladı və yüksək dövlət mükafatlarına layiq görüldüklərinə görə ölkə Prezidenti cənab İlham Əliyevə rəhbərlik etdiyi kollektiv adından hörmət və ehtiramını bildirdi.

Rektor daha sonra geniş məruzə ilə çıxış etdi. Məruzədə təhsil ocağının yaranma tarixi, fəaliyyət istiqamətləri, maddi-texniki bazası, beynəlxalq əlaqələri, uğurları və s. haqqında ətraflı məlumat verildi.

Qeyd olundu ki, universitet iqtisadiyyatın müxtəlif sahələrində uğurla çalışan çoxsaylı məzunları - ixtisaslı kadrları ilə Azərbaycanın inkişafında böyük izlər qoymuş, özünəməxsus elm və təhsil ənənələri formalaşdırmışdır. Azərbaycan Texniki Universiteti müstəqil ali məktəb kimi fəaliyyət göstərməyə başladıqdan sonrakı dövr ərzində müxtəlif ixtisaslar üzrə 90 min nəfərdən çox mühəndis, bakalavr və magistr hazırlanmışdır. AzTU-nun auditoriyalarında yetişmiş intellektual səviyyəli, vətənpərvər ziyalılar onun nüfuzunu daim qoruyub saxlamışlar.

Hazırda universitetdə 9 fakültə, 47 kafedra, 1 elmi mərkəz, 18 elmi-tədqiqat laboratoriyası, 550 min kitab fonduna malik əsaslı kitabxana fəaliyyət göstərir. Burada 26 istiqamət və 68 ixtisas üzrə bakalavr və magistr hazırlanır. Təhsil ocağında 633 nəfər professor-müəllim, o cümlədən 70 nəfərdən çox elmlər doktoru, professor, 330 nəfər elmlər namizədi, dosent 7 mindən çox tələbənin təlim-tərbiyəsi ilə məşğul olur.

Universitetin kadr potensialının formalaşmasında onun öz məzunlarının böyük xidmətləri var. Belə ki, AzTU-nun 360 nəfər məzunu hazırda burada elmi-pedaqoji fəaliyyətlə məşğuldur. Bunların 45 nəfəri elmlər doktoru, professor, 270 nəfəri elmlər namizədi, dosentdir.

AzTU-nun fəaliyyətini səciyyələndirən mühüm cəhətlərdən biri də tədrisin, elmi-tədqiqat işlərinin istehsalatla sıx əlaqələndirilməsidir. Burada metallurgiya, maşınqayırma, nəqliyyat, avtomatika, energetika, və s. sahələr üzrə mühüm elmi-tədqiqat işləri aparılır və alınan nəticələrin istehsalata tətbiqi ilə bağlı əməli işlər görülür.

Mərasimdə çıxış edən Milli Məclis sədrinin müavini Bahar Muradova, AMEA-nın birinci vitse-prezidenti Arif Həşimov, Bakı Dövlət Universitetinin rektoru Abel Məhərrəmov, Azərbaycan Tibb Universitetinin rektoru Əhliman Əmiraslanov, Azərbaycan Dövlət İqtisad Universitetinin rektoru Şəmsəddin Hacıyev, Azərbaycan Dövlət Neft Akademiyasının rektoru Siyavuş Qarayev, Azərbaycan Memarlıq və İnşaat Universitetinin rektoru Gülçöhrə Məmmədova, Lənkəran Dövlət Universitetinin rektoru Asəf İsgəndərov, rabitə və informasiya texnologiyaları nazirinin müavini İltimas Məmmədov, Azərbaycan Təhsil İşçiləri Azad Həmkarlar İttifaqı Respublika Komitəsinin sədr müavini Şaiq Əsgərov, Yasamal RİH-in başçısı İbrahim Mehdiyev və başqaları Azərbaycan Texniki Universitetinin professor-müəllim heyəti və tələbələrini yubiley münasibətilə təbrik etdilər.

Hicran ƏKBƏROVA

Azərbaycan müəllimi.- 2011.- 25 noyabr.- S.2.