Naxçıvan Dövlət Universitetində pedaqoji təcrübəyə həsr olunmuş konfrans

Naxçıvan Dövlət Universitetində yeni tədris ilində keçiriləcək pedaqoji təcrübənin başlanğıc konfransı oldu.

Tədbiri giriş sözü ilə açan ali məktəbin rektoru, akademik İsa Həbibbəyli tələbə və müəllimləri bu əhəmiyyətli hadisə münasibətilə təbrik etdi. Qeyd olundu ki, pedaqoji təcrübənin hər bir tələbənin gələcəyin yüksək intellektli müəllimi, mütəxəssisi kimi formalaşmasındakı rolu danılmazdır. Pedaqoji təcrübə imkan verir ki, təhsil müddətində qazanılan nəzəri bilikləri təcrübədə möhkəmləndirməklə peşə vərdişlərinə yiyələnəsən. Bu səbəbdən təcrübə dövründə metodistlərin, müəllimlərin və tələbələrin üzərinə böyük məsuliyyət düşür. Builki yeniliklərdən söhbət açan rektor qeyd etdi ki, növbəti tədris illərində təcrübənin əhatə dairəsinin genişləndirilməsi və tələbələrin muxtar respublikanın təkcə şəhər orta ümumtəhsil məktəblərinə deyil, həmçinin bir sıra digər kənd məktəblərinə də təcrübəyə cəlb olunması nəzərdə tutulur.

Universitetin tədris işləri üzrə prorektoru, filologiya elmləri doktoru Hüseyn Həşimli builki təcrübənin məqsəd və vəzifələri barədə ətraflı məlumat verdi. Belə ki, bu il universitetin, kredit üsullu ixtisasları da daxil olmaqla, 6 fakültəsinin 17 ixtisası üzrə 306 tələbəsi Naxçıvan Muxtar Respublikasının 14 orta ümumtəhsil məktəbində 4 həftə müddətində pedaqoji təcrübə keçəcək. O da vurğulandı ki, təcrübə zamanı dərslərin təşkilində yeni texnologiyaların, informasiya-kommunikasiya texnologiyalarının (İKT), müasir dünyamızın tələbi kimi, geniş tətbiqi zəruridir.

Naxçıvan MR Təhsil Nazirliyi Aparatının rəhbəri Rəşad Xudiyev çıxışında qeyd etdi ki, muxtar respublikada Ali Məclis sədrinin rəhbərliyi ilə 160-dan çox məktəb əsaslı təmir olunaraq istifadəyə verilib, məktəblər 305 elektron lövhə ilə təchiz olunub. Bu da yeni nəsil pedaqoqların tədris prosesini müasir tələblərə uyğun qurmasına şərait yaradır.

Naxçıvan Şəhər Təhsil Şöbəsinin müdiri Hüseyn Məmmədyarov ölkədə və muxtar respublikada təhsilə, təhsil işçilərinə göstərilən qayğıdan danışdı, təcrübəçi tələbələrə uğurlar dilədi.

Nərmin CƏFƏROVA

Azərbaycan müəllimi.- 2011.- 7 oktyabr.- S.3.