Lütvizadə adına fəxri adlı təqaüd

Naxçıvan Dövlət Universitetinin Elmi Şurasının qərarı ilə yeni tədris ilindən etibarən böyük alim Lütvizadə adına fəxri adlı təqaüd təsis olunmuşdur. Xatırladaq ki, Kaliforniya Universitetinin professoru Lütvizadə XX əsr Azərbaycan elminin, intellektinin dünyaya bəxş etdiyi ən nəhəng sima, qeyri-səlis məntiq nəzəriyyəsinin yaradıcısı, görkəmli elm xadimidir. Təqaüdün təsis olunmasında məqsəd tələbə gənclərin dəqiq elmlərə marağını daha da artırmaq, elmi-tədqiqatçılıq fəaliyyətlərini yüksəltmək, bütün dünyada məşhur olan, Azərbaycan xalqının fəxri, 90 yaşlı böyük alim Lütvizadənin həyatını, elmi nailiyyətlərini öyrənmək və yaşatmaqdır.

Lütvizadə adına fəxri adlı təqaüdə müvafiq olaraq mühəndislik və memarlıq, fizika-riyaziyyat fakültələrindən tələbələrin seçilməsi nəzərdə tutulmuşdur. Bu təqaüdə ilk layiq görülənlər informasiya texnologiyaları və sistemləri mühəndisliyi üzrə II kurs tələbəsi Əliyev Nurəddin Fərman oğlu, riyaziyyat və informasiya müəllimliyi ixtisası üzrə II kurs tələbəsi Ağamalı Kamran Səbzəli oğlu olmuşdur. Təsis zamanı bu tələbələrin təhsil aldıqları bir il ərzində elmdə, təhsildə, yeni texnologiyaların mənimsənilməsində, Tələbə Elmi Cəmiyyətinin xətti ilə aparılan elmi-tədqiqat işlərində xüsusi fərqlənmələri nəzərə alınmışdır.

Mehriban SULTAN

Azərbaycan müəllimi.- 2011.- 7 oktyabr.- S.3.