Azərbaycan Müəllimlər İnstitutunda "dəyirmi masa"

Oktyabrın 6-da Azərbaycan Müəllimlər İnstitutunda AMEA-nın Fəlsəfə, Sosiologiya və Hüquq İnstitutu ilə birlikdə Azərbaycanın dövlət müstəqilliyinin 20-ci ildönümünə həsr edilmiş "Müstəqillik illərində Azərbaycanda elm və təhsilin inkişafı" mövzusunda "dəyirmi masa" keçirildi. Tədbiri giriş sözü ilə AMİ-nin rektoru, millət vəkili, professor Aqiyə Naxçıvanlı açaraq gələn qonaqları salamladı və qeyd etdi ki, xalqlar üçün əziz, həm də müqəddəs olan bir çox dəyərlər mövcuddur. Məsələn, hər bir xalqın dili, onun tarixi, milli mənəvi dəyərləri, sahibi olduğu torpaqlar və digər sərvətlər hər zaman əziz olub və belə də olacaqdır.

Özünün müstəqil dövlətini yaratmaq arzusu və amalı da dünyanın bütün xalqlarına aid edilə biləcək bir müqəddəs istəkdir. Xalqlar bu amal uğrunda bəzən əsrlər boyu mübarizə aparıblar, qan töküblər, çoxsaylı qurbanlar veriblər. Bu da bir həqiqətdir ki, dünyada mövcud olan xalqların bir qismi hələ də öz dövlətini qura bilməyib. Tarixdən o da bəllidir ki, ayrı-ayrı xalqlar da çoxsaylı məhrumiyyətlərdən sonra yaratdığı dövləti sonadək qoruyub saxlaya bilməyib. Biz xoşbəxt xalqıq ki, özümüzün müstəqil dövlətimiz var. Bəli, biz həm də çox mübariz və qürurlu xalqıq ki, 1918-ci ildə qurduğumuz Azərbaycan Xalq Cümhuriyyətini sonadək yaşada bilməsək də, müəyyən fasilədən sonra özümüzdə qüvvə taparaq yenidən dövlət müstəqilliyimizi bərpa edə bildik.

Azərbaycan xalqı dövlət müstəqilliyinə qovuşmaq naminə çox uzun, son dərəcə mürəkkəb, məşəqqətli, həm də olduqca şərəfli bir yol keçib. Bu çətin və şərəfli yolun ayrı-ayrı mərhələləri və məqamları barədə təfsilatı ilə danışmadan təkcə onu deməyi özümə borc bilirəm ki, Azərbaycan xalqı bu yolda əldə olunan uğurlara görə əbədi olaraq ulu öndər Heydər Əliyevə borcludur. Bəli, məhz Heydər Əliyevin səyləri, təşkilatçılığı, rəhbərliyi və uzaqgörənliyi sayəsində SSRİ-nin tərkibində olduğu dövrdə belə bir çox parametrlər üzrə Azərbaycanın gələcəkdə müstəqil dövlət olaraq yaşaya bilməsi üçün hərtərəfli, həm də çox etibarlı təməl qoyulmuşdur. 1993-cü ildə yenidən Azərbaycan rəhbərliyinə qayıtması ilə ulu öndər növbəti dəfə dövlətimizi parçalanmaq və məhv olmaq təhlükəsindən xilas etdi. O, özünün müdrik siyasəti ilə Azərbaycanın daxili və xarici siyasət xəttinin uzunmüddətli strategiyasını müəyyən etdi. Heydər Əliyevin Azərbaycan dövləti və Azərbaycan xalqı qarşısındakı çox mühüm xidmətlərindən biri də onun ailəsində və onun tərbiyəsi altında İlham Əliyevin şəxsində Azərbaycanın gələcək siyasi liderinin yetişməsi oldu.

Azərbaycanın dövlət müstəqilliyinə qovuşmasından keçən 20 il ərzində bütün sahələrdə çox böyük uğurlara imza atılıb. Dövlətimiz regionda söz və qüdrət sahibi olan bir dövlətə çevrilib. İndi Azərbaycanın adı çox mötəbər tribunalardan tez-tez, özü də çox böyük ehtiramla səslənir. Bütün bunlar çox yaxşıdır. Amma harada yaşamasından, hansı peşə sahibi olmasından və hansı vəzifə tutmasından asılı olmayaraq hər bir azərbaycanlı bütün bunların qədrini bilməlidir, dövlət müstəqilliyimizin əbədi olması üçün əlindən gələni əsirgəməməlidir.

Sonra tədbirdə çıxış edən AMEA-nın Fəlsəfə, Sosiologiya və Hüquq İnstitutunun direktoru, fəlsəfə elmləri doktoru İlham Məmmədzadə "Müasirləşmə dövründə elm və təhsil", həmin İnstitutun aparıcı elmi işçisi, pedaqogika üzrə fəlsəfə doktoru Habil Həmidov "Azərbaycanda təhsil siyasəti", fəlsəfə elmləri doktoru Rəna Mirzəzadə "Siyasətdə və politologiyada İKT strategiyası", AMİ-nin kafedra müdiri, tarix elmləri doktoru Qafar Cəbiyev "Müstəqillik illərində Azərbaycanda tarix elminin inkişafı" mövzularında çıxışlar etdilər.

Tədbirdə iştirak edən AMİ-nin əməkdaşlarından professor Ramiz Məmmədzadə, professor Mircəfər Həsənov, əlavə təhsil üzrə prorektor Rahim Əzizov, siyasi elmlər üzrə fəlsəfə doktoru Məmmədağa Sərdarov və digərləri müstəqillik illərində Azərbaycanda elm və təhsilin inkişafı yolunda qazanılan uğurlardan və bu sahədə qarşıda duran vəzifələrdən danışdılar.

Ədalət DAŞDƏMİRLİ

Azərbaycan müəllimi.- 2011.- 7 oktyabr.- S.6.