Yüksək mükafat bayram sevincimi daha da artırdı

Digər peşə-ixtisas sahibləri kimi təhsil sahəsində çalışanlar da hər il öz peşə bayramlarını - 5 Oktyabr Beynəlxalq Müəllimlər Gününü təntənə ilə qeyd edirlər. Təhsilin, müəllimin cəmiyyətin inkişafındakı böyük rolunu yüksək qiymətləndirən, təhsilə, təhsil işçilərinə daim xüsusi diqqət və qayğı göstərən dövlətimizin başçısı möhtərəm Prezidentimiz İlham Əliyev hər il olduğu kimi bu il də peşə bayramları ərəfəsində təhsil sahəsində xidmətləri olan xeyli təhsil işçisini "Tərəqqi" medalı ilə təltif edib, bir qrup müəllimə "Əməkdar müəllim" fəxri adı verib.

Pedaqoji ictimaiyyətimizin böyük rəğbətlə qarşıladığı bu təltiflər, təbii ki, müəllimlərin bayram sevincini qat-qat artırıb. Bu günlər belə ikiqat sevinc - həm bayram, həm də mükafat sevincini yaşayanlardan biri də mənəm. Belə ki, möhtərəm Prezidentimizin 3 oktyabr 2011-ci il tarixli sərəncamı ilə mən də "Tərəqqi" medalı ilə təltif olunmuşam.

Uzun illərdir ki, təhsil sahəsində çalışıram. 1999-cu ildən Bakının Binəqədi rayonundakı 244 nömrəli tam orta məktəbə rəhbərlik edirəm. Pedaqoji fəaliyyətimlə yanaşı, ölkənin siyasi həyatında da yaxından iştirak edirəm. Xeyli müddətdir ki, 8 nömrəli Binəqədi 1 saylı seçki dairəsinin sədriyəm.

Pedaqoji sahədəki fəaliyyətim, dövlətçiliyimizə xidmətlərim dəfələrlə ən müxtəlif səviyyələrdə qiymətləndirilib. Təhsil Nazirliyinin "Qabaqcıl təhsil işçisi" döş nişanına, fəxri fərmanlarına, Binəqədi Rayon İcra Hakimiyyətinin fəxri fərmanlarına layiq görülmüşəm. Lakin "Tərəqqi" medalı zəhmətimə verilən ən böyük qiymət, dövlət təltifidir. Mən bunun üçün, eləcə də təhsilimizə göstərdiyi diqqət və qayğıya görə Azərbaycan Prezidenti cənab İlham Əliyevə dərin minnətdarlığımı bildirirəm. Belə yüksək mükafatları biz müəllimlər dövlətimizin etimadı kimi dəyərləndirir, daha fəal çalışmaq üçün böyük stimul hesab edirik.

Əlbəttə, layiq görüldüyüm mükafatı həm də bir kollektiv rəhbəri kimi məktəbimizin fəaliyyətinə, son illər qazandığımız uğurlara verilən yüksək qiymət hesab edirəm. 1999-cu ildə direktor təyin olunandan sonra öz fəaliyyəti, uğurları ilə o vaxt o qədər də fərqlənməyən məktəbimizi kollektivin köməyi ilə qısa müddət ərzində paytaxtımızın ən yaxşı ümumtəhsil müəssisələrindən birinə çevirməyə nail olmuşam.

Pedaqoji sahədə çalışmaqla yanaşı uzun illərdir ki, həm də elmi fəaliyyətlə məşğulam. Azərbaycanda orta təhsilin sosial -fəlsəfi problemlərinə dair araşdırma apararaq dissertasiya müdafiə edib, fəlsəfə doktoru alimlik dərəcəsi almışam. Üç elmi əsərin müəllifiyəm, bir neçə monoqrafiyam çap olunub, 15-ə qədər elmi məqaləm xarici mətbuatda dərc edilib.

Məktəbimizin də son illər uğurları artıb. Tədris ocağımız 2008-2009-cu tədris ilində möhtərəm Prezidentimizin müvafiq sərəncamına əsasən keçirilən "Ən yaxşı ümumtəhsil məktəbi" müsabiqəsində qalib gələrək 10000 manat birdəfəlik pul mükafatı alıb.

Bir müəllimimiz "Əməkdar müəllim", üç müəllimimiz "Ən yaxşı müəllim" müsabiqəsinin qalibdir.

Hər il məzunlarımızın böyük əksəriyyəti yüksək balla ölkənin və xarici dövlətlərin ali məktəblərinə qəbul olunur. Bu il 92 məzunumuz tələbə adını qazanıb. Onlardan 13-ü xarici ölkələrdə oxuyur, 18 nəfər orta ixtisas məktəblərinə qəbul olunub. Məzunlarımızdan 5-i qəbul imtahanlarında 600-dən çox, 20 nəfər isə 500-600 arasında bal toplayıb.

İdman sahəsində də böyük uğurlara imza atmışıq. Məktəbimiz 13 ildir ki, dalbadal Binəqədi rayonu məktəblilərinin spartakiadasında I yeri tutur.

Hazırda məktəbimizdə 1500-dən çox şagird təhsil alır, onların təlim-tərbiyəsi ilə 200-ə yaxın müəllim məşğul olur. Məktəbimizdə mövcud olan 3 kompüter otağı İKT-nın tədrisə tətbiqinə imkan verir. Müəllimlərimizin 90 faizi İKT üzrə treninqlərdən keçib. Bütün bunların nəticəsidir ki, yeni dərs ilinə uğurla başlamışıq.

Layiq görüldüyüm yüksək dövlət mükafatı, şübhəsiz, daha səmərəli fəaliyyət üçün stimul olacaq, etimadı doğrultmaq üçün daha səylə çalışacağıq.

Yəhya ABBASOV

Azərbaycan müəllimi.- 2011.- 7 oktyabr.- S.10.