"Ən yaxşı ümumtəhsil məktəbi", "Ən yaxşı müəllim" müsabiqələrinin 2009-cu il üzrə qalibləri haqqında kitab çapdan çıxıb

Azərbaycan Respublikasının Prezidenti İlham Əliyevin "Ən yaxşı ümumtəhsil məktəbi və ən yaxşı müəllim mükafatlarının təsis edilməsi haqqında" 2007-ci il 4 sentyabr tarixli Sərəncamına əsasən 2008-ci ildən başlayaraq təhsil tariximizdə ilk dəfə ölkəmizdə "Ən yaxşı ümumtəhsil məktəbi" və "Ən yaxşı müəllim" müsabiqələri keçirilir. 4 müsabiqə artıq arxada qalmış, hər birində 100 müəllim və 50 məktəb olmaqla 400 müsabiqə qalibi müəllimə və 200 müsabiqə qalibi ümumtəhsil müəssisəsinə Prezident sərəncamları ilə müvafiq olaraq 5000 və 10000 manat birdəfəlik pul mükafatları verilmişdir.

Müsabiqələri keçirmək üçün Təhsil Nazirliyinin əmri ilə yaradılmış Təşkilat Komitəsinin sədri, təhsil naziri Misir Mərdanovun təşəbbüsü ilə müsabiqə qalibləri haqqında kitabların çap olunması planlaşdırılmışdır. Bu silsilədən 2008-ci il müsabiqələrinin nəticələrinə həsr olunmuş "İlk 50 ən yaxşı məktəb, 100 ən yaxşı müəllim" adlı ilk kitab 2009-cu ildə çapdan çıxmışdır. Bu günlərdə isə 2009-cu il üzrə müsabiqələrin nəticələrinə dair kitab işıq üzü görmüşdür.

"Şərq-Qərb" nəşriyyatında nəfis tərtibatla, yüksək poliqrafik keyfiyyətlə çap olunmuş kitab "Ən yaxşı müəllim, Ən yaxşı məktəb. 2009" adlanır. Azərbaycan Respublikasının təhsil naziri, əməkdar elm xadimi, professor Misir Mərdanovun rəhbərliyi ilə hazırlanmış kitabın tərtibçiləri Təhsil Nazirliyinin əməkdaşları Billurə Hacızadə və Bəşarət Məmmədov, redaktoru isə siyasi elmlər üzrə fəlsəfə doktoru, Təhsil Nazirliyinin İctimaiyyətlə əlaqə şöbəsinin müdiri Bayram Hüseynzadədir.

Kitabda 2008-2009-cu tədris ili üzrə keçirilmiş "Ən yaxşı ümumtəhsil məktəbi" və "Ən yaxşı müəllim" müsabiqələrinə dair normativ qaydalar, Təhsil Nazirliyinin müvafiq əmrləri, Təşkilat Komitəsinin qiymətləndirmə sənədləri öz əksini tapıb. Burada habelə müsabiqə qalibi olan 100 müəllimin fəaliyyəti, qazandıqları uğurlar və 50 ən yaxşı ümumtəhsil məktəbi haqqında ətraflı məlumat verilib.

564 səhifəlik sanballı nəşrin ilk səhifələrində ulu öndərimiz Heydər Əliyevin və Azərbaycan Prezidenti cənab İlham Əliyevin müəllim haqqında qiymətli fikirlərindən nümunələr və təhsilə göstərdikləri qayğını əks etdirən fotoşəkillər yer alıb.

Azərbaycan Respublikasının təhsil naziri, əməkdar elm xadimi, professor Misir Mərdanovun kitaba yazdığı "Ön söz"də cəmiyyətdə müəllimin rolu, müxtəlif dövrlərdə məşhur tarixi şəxsiyyətlərin, dövlət xadimlərinin, sərkərdələrin müəllimə verdikləri qiymət və müəllim haqqında dedikləri müdrik kəlamlar, son illər təhsilimizdə aparılan islahatlar və onların sayəsində təhsil sahəsində əldə olunmuş uğurlar, təhsilimizə dövlət qayğısı, Azərbaycan Prezidenti İlham Əliyevin rəhbərliyi altında təhsil sahəsində görülmüş işlər, xüsusən də təhsilin inkişafı naminə qəbul olunmuş proqramlar və onların həyata keçirilməsi, qazanılan nailiyyətlər öz əksini tapmışdır.

"Ön söz"də haqlı olaraq qeyd edilir ki, Təhsil Nazirliyi bu müsabiqələrin keçirilməsinə böyük məsuliyyətlə yanaşır, müsabiqəyə sənəd vermiş hər bir müəllimin, məktəbin fəaliyyətinin obyektiv qiymətləndirilməsinə səy göstərir.

Kitabda Azərbaycan Prezidentinin 2008-2009-cu tədris ilində keçirilmiş hər iki müsabiqənin qaliblərinin mükafatlandırılması haqqında sərəncamları da ön səhifələrdə oxuculara təqdim olunub. Sərəncamlardan sonra ardıcıl şəkildə "Ən yaxşı müəllim", "Ən yaxşı ümumtəhsil məktəbi" müsabiqələrinin qalibləri haqqında materiallar verilmiş, bunlardan sonra isə müsabiqələrə dair sənədlər, müsabiqənin II mərhələsini qiymətləndirmə sənədləri və s. təqdim olunmuşdur. Kitabda müsabiqənin müxtəlif anlarını əks etdirən çoxlu sayda fotoşəkillərin verilməsi onun əyaniliyini daha da artırır.

Kitab Azərbaycanın təhsil tarixi ilə maraqlananlar, orta məktəb müəllimləri, bütövlükdə təhsil işçiləri üçün nəzərdə tutulmuşdur.

Yusif ƏLİYEV

Azərbaycan müəllimi.- 2011.- 14 oktyabr.- S.3.