Qrant Sazişi imzalandı

Oktyabrın 12-də Koreya Respublikasının Xarici İşlər və Ticarət Nazirliyi və Azərbaycan Respublikasının Təhsil Nazirliyi arasında Azərbaycan Texniki Universitetinin Təhsil İnformasiya Sisteminin yaradılması üzrə Qrant Sazişinin imzalanması mərasimi keçirildi.

Təhsil Nazirliyində keçirilən mərasimi nazir Misir Mərdanov açaraq iştirakçıları salamladı. Son illər Azərbaycanın beynəlxalq əlaqələrinin müxtəlif istiqamətlərdə genişləndiyini qeyd edən təhsil naziri bu amili ölkə Prezidenti cənab İlham Əliyevin uğurlu xarici siyasətinin təntənəsi kimi dəyərləndirdi.

Azərbaycanla Koreya arasında çox sıx əməkdaşlıq əlaqələrinin yaradılmasından, təhsil sahəsində görülən işlərdən bəhs edən Misir Mərdanov daha sonra imzalanacaq sənəd haqqında məlumat verərək bildirdi ki, Qrant Sazişi üzrə nəzərdə tutulan işlər Koreya Beynəlxalq Əməkdaşlıq Agentliyi (KOİCA) və Azərbaycan Texniki Universiteti tərəfindən həyata keçiriləcək.

Nazir Misir Mərdanov Azərbaycanla Koreya arasında təhsil sahəsində əməkdaşlığın inkişafında KOİCA-nın mühüm rolu olduğunu qeyd etdi. Bildirdi ki, hər il bu təşkilat tərəfindən elan edilən müxtəlif növ təqaüd proqramları Koreyada azərbaycanlı mütəxəssis və tələbələrin təhsil almasına geniş imkanlar yaradır. Təhsil naziri bütün bunlara görə qurumun rəhbərliyinə, eləcə də üzvlərinə təşəkkürünü bildirdi.

Verilən məlumatdan aydın oldu ki, layihənin əsas məqsədi informasiya-kommunikasiya texnologiyalarından səmərəli istifadə etməklə universitetin idarəetmə sisteminin təkmilləşdirilməsidir. Təkmilləşdirmə işlərinin universitetin idarəetmə sistemində məhsuldarlığın və səmərəliliyin artırılması, eləcə də akademik şəbəkə texnologiyaları ilə tanışlıq istiqamətində həyata keçirilməsi nəzərdə tutulub.

2 milyon ABŞ dolları dəyərində olan layihənin 3 il müddətində başa çatdırılacağını və bütün xərclərin KOİCA tərəfindən ödəniləcəyini deyən Misir Mərdanov layihədə bu təşkilatın Azərbaycan Texniki Universitetini zəruri avadanlıqlarla təmin etməsi, koreyalı mütəxəssislərin Azərbaycana ezam olunması, Azərbaycan Texniki Univesitetinin işçi və mühəndisləri üçün Koreyada təlimlərin təşkili və digər bu kimi mühüm məsələlərin əks olunduğunu diqqətə çatdırdı.

Nazir çıxışının sonunda layihənin uğurla həyata keçiriləcəyinə əminliyini ifadə etdi və bu dəstəyə görə Azərbaycan hökuməti adından koreyalı qonaqlara təşəkkürünü bildirdi.

Sonra Koreya Respublikasının ölkəmizdəki fövqəladə və səlahiyyətli səfiri Li Ci Ha çıxış etdi. Koreya ilə Azərbaycanın təhsil sahəsi üzrə birgə həyata keçirdiyi tədbirlərdən söz açan səfir iki ölkənin prezidentlərinin qarşılıqlı səfərlərinin əməkdaşlıq əlaqələrinin inkişafında mühüm rol oynadığını vurğuladı. KOİCA-nın məqsədlərindən, dünyanın 26 ölkəsi, o cümlədən keçmiş sovetlər birliyinə daxil olan respublikalardan yalnız Azərbaycan və Özbəkistanla əlaqələr yaratdığından bəhs edən Li Ci Ha iki ölkə universitetləri arasında birbaşa əməkdaşlığın da mövcud olduğunu qeyd etdi. Səfir diqqətə çatdırdı ki, hazırda 76 azərbaycanlı gənc Koreyanın, 22 koreyalı isə Azərbaycanın ali məktəblərində təhsil alır. Səfir layihənin həyata keçirilməsində öz dəstəyini əsirgəməyəcəyini vurğuladı.

Sonra imzalanma mərasimi oldu. Sənədləri təhsil naziri Misir Mərdanov və Koreyanın ölkəmizdəki səfiri Li Ci Ha imzaladılar.

Mərasimdə Koreya Beynəlxalq Əməkdaşlıq Agentliyinin Azərbaycan ofisinin rezident nümayəndəsi Kim Eun Suk və Azərbaycan Texniki Universitetinin rektoru Havar Məmmədov iştirak edirdilər.

Hicran ƏKBƏROVA

Azərbaycan müəllimi.- 2011.- 14 oktyabr.- S.4.