Görkəmli alimin 100 illik yubileyi keçirilib

Azərbaycan Dövlət Mədəniyyət və İncəsənət Universitetində əməkdar elm xadimi, AMEA-nın müxbir üzvü, professor Abbas Zamanovun 100 illiyinə həsr olunmuş yubiley tədbiri keçirilib.

Tədbiri açıq elan edən universitetin rektoru, professor T.Əfəndiyev böyük şəxsiyyət, istedadlı alim A.Zamanovun insani keyfiyyətləri, elmi fəaliyyətindən söhbət açıb, onunla bağlı xatirələrini söyləyib.

Universitetin sənətşünaslıq fakültəsinin kafedra müdiri, filologiya elmləri doktoru, professor Gülşən Əliyevanın daha çox şəxsi müşahidələri, son dərəcə səmimi, bir qədər də emosional tonda olan çıxışı da konfrans iştirakçıları tərəfindən böyük maraqla qarşılanıb.

Filologiya elmləri doktoru, professor Qəzənfər Paşayevin Abbas Zamanov haqqında söylədikləri görkəmli alim haqqında bir çox həqiqətləri açıqlayıb.

Professorlar Nizaməddin Şəmsizadə ilə Kamran Əliyev bir vaxtlar dərs aldıqları, müdrik məsləhətlərini dinlədikləri müəllimləri barədə xatirələrini söyləməklə dinləyici auditoriyasında xüsusi bir canlanma yaradıblar.

Tədbirin sonunda Abbas Zamanovun oğlu Fuad Zamanov və qız nəvəsi Gülgün Rzayeva bu tədbirə görə ADMİU-nin rəhbərliyinə, professor-müəllim heyətinə təşəkkürlərini bildiriblər.

Sifai SƏFƏROVA

Azərbaycan müəllimi.- 2011.- 14 oktyabr.- S.6.