"Çiçəklənən Azərbaycan" rəsm müsabiqəsinin qalibləri mükafatlandırıldı

Oktyabrın 19-da T.İsmayılov adına "Uşaq dünyası" Rəsm Qalereyasında Təhsil Nazirliyinin təşkilatçılığı ilə Azərbaycanın dövlət müstəqilliyinin bərpasının 20-ci ildönümünə həsr edilmiş "Çiçəklənən Azərbaycan" mövzusunda ümumtəhsil məktəblərinin şagirdləri arasında təşkil olunmuş rəsm müsabiqəsi qaliblərinin mükafatlandırılması mərasimi keçirildi. Tədbirdə təhsil nazirinin müavini Qulu Novruzov, Ailə, Qadın və Uşaq Problemləri üzrə Dövlət Komitəsi sədrinin müavini Aynur Sofiyeva, gənclər və idman nazirinin müavini İntiqam Babayev, Azərbaycan Rəssamlıq Akademiyasının prorektoru Səlhab Məmmədov və digər şəxslər iştirak edirdilər. Qeyd edək ki, müsabiqə 3 mərhələdə - məktəb, şəhər, rayon və respublika mərhələsində keçirilib. Müsabiqənin şəhər, rayon mərhələsində 8 minə yaxın məktəbli iştirak edib. Müsabiqənin respublika mərhələsinə 210 rəsm işi təqdim edilmişdir. Azərbaycan Rəssamlıq Akademiyasının peşəkar rəssamlarından ibarət münsiflər heyəti tərəfindən aparılan seçimlərə görə 9 nəfər I yerə, 9 nəfər II yerə, 9 nəfər III yerə layiq görülmüş, 3 nəfər isə müsabiqədə fəal iştirak etdiyinə görə diplomlarla mükafatlandırılmışdır.

Tədbiri giriş sözü ilə açan təhsil nazirinin müavini Qulu Novruzov müsabiqənin əhəmiyyətindən danışdı. Bildirdi ki, müsabiqəni keçirməkdə məqsəd uşaq və gəncləri dövlətçilik, vətənpərvərlik, vətənə sədaqət ruhunda tərbiyə etməkdir. Bölgələrdən olan şagirdlərin müsabiqəyə xüsusi maraq göstərdiklərinin sevindirici olduğunu bildirən nazir müavini Qulu Novruzov məktəblilərin rəsm əsərlərində yeniləşən, inkişaf edən Azərbaycanın geniş təsvir olunduğunu iştirakçıların nəzərinə çatdırdı. Q.Novruzov xalqımızın əldə etdiyi müstəqilliyin böyük nemət olduğunu və daim qorunub saxlanılması üçün var gücümüzlə çalışmağın vacibliyini qeyd etdi.

Son illər təhsil sahəsində aparılan islahatlardan danışan Q.Novruzov ölkə Prezidenti cənab İlham Əliyevin təhsilə göstərdiyi diqqət və qayğıdan söz açdı. Belə tədbirlərin keçirilməsini təqdirəlayiq hal kimi qiymətləndirən nazir müavini müsabiqədə iştirak edən, lakin qalib gəlməyən şagirdlərə ruhdan düşməməyi və yaradıcılıq işlərini davam etdirərək məqsədə doğru irəliləməyi tövsiyə etdi. Qalib şagirdləri və onların valideynlərini təbrik edən Q.Novruzov onlara gələcək işlərində uğurlar arzuladı.

Tədbirdə çıxış edən gənclər və idman nazirinin müavini İntiqam Babayev, Ailə, Qadın və Uşaq Problemləri üzrə Dövlət Komitəsi sədrinin müavini Aynur Sofiyeva və Azərbaycan Rəssamlıq Akademiyasının prorektoru Səlhab Məmmədov müsabiqənin əhəmiyyətindən danışaraq qalibləri təbrik etdilər.

Sonda qaliblərə Təhsil Nazirliyinin diplomları təqdim edildi.

Niyazi RƏHİMOV

Azərbaycan müəllimi.- 2011.- 21 oktyabr.- S.6.