İğdır Universiteti ilə NDU arasında protokol imzalandı

Bu günlərdə Türkiyə Respublikasının İğdır Dövlət Universitetinin rektoru professor-doktor İbrahim Hakkı Yılmazın rəhbərliyi altında 11 nəfərlik nümayəndə heyəti Naxçıvan Dövlət Universitetində olmuşdur. Tələbə şəhərciyi ilə əyani tanışlıq zamanı qonaqlara universitet ərazisində aparılan genişmiqyaslı yenidənqurma işləri, istifadəyə verilən yeni korpuslar haqqında ətraflı məlumat verilmişdir.

Qarşılıqlı fikir mübadiləsi zamanı Naxçıvan Dövlət Universitetinin rektoru, akademik İsa Həbibbəyli NDU-nun fəaliyyət göstərdiyi 45 il ərzində keçilən inkişaf yolundan, tədris prosesində tətbiq olunan yenilik və dəyişikliklərdən, gələcək perspektivlərdən danışmışdır. Ali məktəbin dünyanın 50-dən çox universiteti ilə mövcud sıx əlaqələrindən söz açan rektor qardaş Türkiyə Respublikasının Elazığdakı Fırat, İzmitdəki Kocaeli, Kayseridəki Erciyez, Erzurumdakı Atatürk, Van 100-cü il, Qars, Ankara kimi universitetləri ilə möhkəm təməllər üzərində qurulmuş əməkdaşlıq münasibətlərini xüsusi vurğulamışdır. Rektor İğdır Universiteti ilə də uzunmüddətli əməkdaşlığın qurulacağına əminliyini bildirmişdir.

İğdır Universitetinin rektoru bütün azərbaycanlıları tarixi əhəmiyyətli bayram - dövlət müstəqilliyinin bərpasının 20-ci ildönümü münasibətilə təbrik etmişdir. Rəhbərlik etdiyi təhsil ocağında tədris olunan fənlər, kadr hazırlığı işi haqqında məlumat verən qonaq qeyd etmişdir ki, ilk olaraq İğdır texnikumu kimi fəaliyyətə başlamış, 1995-ci ildə Qafqaz Universitetinin nəzdində "Menecment" ixtisası üzrə fəaliyyət göstərən universitetdə həmin il 16 müəllim və 2 texniki işçi ilə 20 tələbəyə təhsil verilmişdir. 2006-cı ildə İğdırda Qafqaz Universitetinin nəzdində Kənd təsərrüfatı fakültəsi qurulmuşdur. 2008-ci ildən 30 tələbə ilə təhsilə başlayan fakültə 2008-2009-cu tədris ilindən "İğdır Universiteti" adı altında fəaliyyətə başlamışdır.

Görüşdə iki universitet arasında sosial, mədəni və elmi tədqiqat işlərinin aparılması sahələrində əməkdaşlığa dair protokol imzalanmışdır. Sənədə əsasən 5 il müddətində universitetlərarası qarşılıqlı magistrant, doktorant və müəllim mübadiləsi həyata keçiriləcək.

Rəsmi görüşdən sonra türkiyəli qonaqlara ali məktəbin konservatoriyasında konsert proqramı təqdim olunmuşdur. Musiqili tədbirdə Azərbaycanın dahi bəstəkarı Üzeyir Hacıbəyovun "Arazbarı", xarici tələbələrdən ibarət "Dostluq" vokal qrupunun ifasında Azərbaycan xalq mahnısı "Bəri bax", Tofiq Quliyevin "Vals"ı, türk mahnısı "Məmləkətim" və digər ifalar səslənmiş, həmçinin Tələbə Teatr Studiyasının "Yallı" qrupunun rəngarəng rəqsləri nümayiş olunmuşdur.

Sonda simvolik hədiyyələr təqdim olunmuş, xatirə şəkli çəkdirilmişdir.

Nərmin CƏFƏROVA

Azərbaycan müəllimi.- 2011.- 28 oktyabr.- S.11.