"Narkomaniyaya yox deyirik"

Bakının Əmircan qəsəbəsindəki A.Səfərov adına 114 nömrəli orta məktəbdə "Narkomaniyaya yox deyirik" adlı tədbir keçirildi. Öncə üçrəngli dövlət bayrağı səhnəyə gətirildi. Şagirdlərin ifasında Dövlət himni səsləndi.

Şagirdlərin hazırladıqları "Zərərli vərdişlər və cinayətkarlıq" və "Susmuş vicdan" səhnəcikləri göstərildi. Səhnələşdirilən tamaşalarda XXI əsrin ən qlobal problemlərindən olan və "ağ ölüm" milyonlarla insanın həyatına son qoyan narkomaniyaya düçar olmuş insanların aqibəti öz əksini tapmışdı.

Tədbirin aparıcıları bildirdilər ki, son illərdə narkotiklərin qanunsuz dövriyyədən çıxarılması ilə bağlı böyük işlər görülsə də, narkomaniyanın statistikasında gəncləşmə müşahidə edilir. Əvvələr narkomanlar 25-35 yaş arasında olurdularsa, indi bu rəqəm 18 yaşa enib.

Zərərli vərdişlərin törətdiyi ağır bəlalardan danışan məktəbin direktoru Ceyran Novruzova bildirdi ki, problemin qarşısının alınmasında maarifləndirmə işinin rolu böyükdür.

Məktəbin şagirdləri yaşıdlarına müraciət etdilər. Bildirdilər ki, böyüməkdə olan gənc nəsil iradəli və möhkəm olmalıdır. Bu gün hər bir Azərbaycan məktəblisi və gənci pis vərdişlərə meyil göstərməməlidir. Onlar yüksək səviyyədə tərbiyə olunmalı və savadlı yetişməlidirlər.

Hər birimiz unutmamalıyıq ki, vətənimizin olduqca hiyləgər düşmənləri var. O düşmənlər torpaqlarımızın 20 faizdən çoxunu işğal ediblər. Bu gün qarşımızda duran ən mühüm vəzifə vətənimizin ərazi bütövlüyünü bərpa etməkdir.

Tədbirdə iştirak edən qonaqlar da çıxış edərək zərərli vərdişlərin törətdiyi faciələrdən danışdılar. Gənclərə tövsiyə olundu ki, zərərli vərdişlərdən həmişə uzaq olsunlar.

Rəşad ZİYADOV

Azərbaycan müəllimi.- 2011.- 28 oktyabr.- S.19.