Beynəlxalq musiqi müsabiqəsinin 8 yaşlı qalibi

Yaşıdlarından qeyri-adi istedadı və bacarığı ilə fərqlənən 8 yaşlı Züleyxa Abdullayeva Bakıda anadan olub. O, Azərbaycan Milli Konservatoriyasının nəzdində İncəsənət gimnaziyasının fortepiano şöbəsinin şagirdidir. Təhsil ocağında keçirilən tədbirlərdə, ədəbi-bədii gecələrdə həmişə öz məharətini göstərən Züleyxa ötən tədris ili musiqi müsabiqəsində birincilik qazanıb və diplomla mükafatlandırılıb. Dərslərini "əla" qiymətlərlə başa vuran Züleyxa yay tətili günlərini mənalı və səmərəli keçirir. O, istirahət vaxtlarında da öz üzərində çalışır. Artıq dünya bəstəkarlarının çoxlu sayda əsərlərini öyrənib.

Qeyd edək ki, Züleyxa Abdullayeva İtaliyada keçirilən XIV beynəlxalq musiqi müsabiqəsinin qalibidir. Müsabiqədə o, İ.Baxın "Kiçik prelüdiya", F.Şopenin "Mazurka", M.Klementin "Sonatina" kimi musiqi əsərlərini ifa edərək birincilik qazanıb. Avropanın musiqi arenasında Azərbaycanı layiqincə təmsil edən Züleyxa Pyetro Arcento adına təqaüdə layiq görülüb. Tez-tez müxtəlif televiziya kanallarında Züleyxa öz canlı ifaları və maraqlı çıxışları ilə tamaşaçıları heyran edir. Bütün bu uğurlarına görə balaca fortepianoçu musiqi müəllimi Nigar Nəcəfovaya minnətdar olduğunu söyləyir. O, yeni tədris ili üçün hazırlanacaq musiqi nömrələri üzərində səylə çalışır.

 

 

Sifai SƏFƏROVA

 

Azərbaycan müəllimi.- 2011.- 2 sentyabr.- S.7.