Ali təhsil ocağında milli musiqi gününün təntənəsi

Dahi bəstəkar, Azərbaycan klassik musiqisinin banisi, musiqişünas alim, ictimai xadim Üzeyir Hacıbəyovun anadan olmasının 126-cı ildönümü və Milli musiqi günü münasibətilə Naxçıvan Dövlət Universitetində yubiley tədbiri keçirilib.

Mərasimdə giriş sözü ilə çıxış edən ali məktəbin rektoru, akademik İsa Həbibbəyli Üzeyir Hacıbəyovun Azərbaycan klassik musiqisinin inkişafındakı əvəzsiz xidmətlərindən danışaraq, onun pedaqoq, bəstəkar, musiqişünas və publisist kimi yaradıcılığına qısa nəzər salıb. Qeyd olunub ki, bu gün sadəcə musiqisevərlərin yox, həm də xalqımızın bayramıdır. Böyük bəstəkarın ad günü bayram kimi hər il ölkəmizdə geniş qeyd olunur. 1995-ci ildə ümummilli lider Heydər Əliyevin fərmanı ilə 18 sentyabrın Milli musiqi günü kimi qeyd olunması qərara alınıb. Rektor həmçinin tələbə və müəllimləri yeni tədris ilinin başlanması münasibətilə təbrik edərək müvəffəqiyyətlər diləyib.

NDU-nun Fortepiano kafedrasının dosenti, sənətşünaslıq üzrə fəlsəfə doktoru Natəvan Qədimova "Üzeyir Hacıbəyov və Azərbaycan musiqi mədəniyyəti" adlı məruzəsində Azərbaycan peşəkar musiqisinin banisi Üzeyir Hacıbəyovun həyat və yaradıcılığından, milli musiqimizin inkişafında göstərdiyi əvəzsiz xidmətlərindən söhbət açıb. Məruzədə vurğulanıb ki, milli musiqi xəzinəsini yeni janr və formalarla zənginləşdirən dahi korifey elmi musiqişünaslığın, musiqi təhsilinin əsasını qoyub və ömrünün sonunadək musiqi mədəniyyətimizin inkişafına xidmət edib. Onun yaratdığı musiqi inciləri dünya şöhrəti qazanıb və dünya musiqi mədəniyyətinin qızıl fonduna daxil olub.

Tədbirdə dahi bəstəkar haqqında videokadrlar da nümayiş olunub.

Yubiley tədbiri dahi bəstəkarın əsərləri əsasında hazırlanan, ali məktəbin İncəsənət fakültəsinin müəllim və tələbələrinin ifasında maraqlı konsert proqramı ilə davam etdirilib. Bədii hissədə universitetin kamera orkestrinin müşayiəti ilə "Leyli və Məcnun" operasından müqəddimə, "Arşın mal alan" operettasından "Əsgərin ariyası", "Koroğlu" operasından "Nigarın ariyası" və digər əsərlər ifa olunub.

Nərmin CƏFƏROVA

Azərbaycan müəllimi.- 2011.- 23 sentyabr.- S.15.