Kiyev şəhərinin üç məktəbində soydaşlarımıza Azərbaycan dili öyrədilir

Bu ilin əvvəllərində Ukraynanın paytaxtı Kiyev şəhərinin Təhsil və Elm İdarəsi ilə Bakı Şəhəri üzrə Təhsil İdarəsi arasında əməkdaşlıq haqqında müqavilə imzalanıb. Hər iki şəhərin təhsil sahəsində əməkdaşlıq əlaqələrini daha da inkişaf etdirmək məqsədi daşıyan müqavilədə nəzərdə tutulan tədbirlər hazırda uğurla həyata keçirilir. Heydər Əliyev adına Ukrayna-Azərbaycan Təhsil, Elm-mədəniyyət, İdman Mərkəzindən verilən məlumata görə, müqavilə çərçivəsində yeni tədris ilindən Kiyevin üç ümumtəhsil müəssisəsində - 37, 188 və 247 nömrəli məktəblərində 50-dən çox məktəbyaşlı soydaşımıza Azərbaycan dili öyrədilir. Həmin şagirdlər Azərbaycan Respublikası Təhsil Nazirliyinin dəstəyi ilə zəruri tədris ləvazimatları ilə təmin olunublar. Sözügedən mərkəzin və "Beynəlxalq Azərbaycançılıq İnstitutu" ictimai təşkilatının birgə təşkil etdikləri Azərbaycan dilindən fakültativ kurs üzrə məşğələləri təcrübəli müəllim Səfayə Naibova aparır. Həmin müəllimin müvafiq təlim kursundan keçməsinə kömək göstərilməsi üçün bu günlərdə "Beynəlxalq Azərbaycançılıq İnstitutu" ictimai təşkilatının və Heydər Əliyev adına Ukrayna-Azərbaycan Təhsil, Elm-mədəniyyət, İdman Mərkəzinin rəhbərlikləri tərəfindən məktubla Təhsil Nazirliyinə müraciət edilib.

İctimai təşkilatın prezidenti O.Krapivin və Mərkəzin direktoru, professor A.Quliyevin imzaladıqları məktubda eyni zamanda sözügedən kursun yaradılmasında və şagirdlərin müvafiq tədris materialları ilə təminatında göstərdikləri kömək və qayğı üçün Təhsil Nazirliyinə və Bakı Şəhəri üzrə Təhsil İdarəsinə minnətdarlıq bildirilir.

Yusif ƏLİYEV

Azərbaycan müəllimi.- 2011.- 23 sentyabr.- S.1.