Prezident mükafatçısı

Son illər çox sayda müsabiqələrin keçirilməsi, nəticələrin obyektiv qiymətləndirilməsi müəllimlərin fəallaşmalarına, onlarda pedaqoji işə yaradıcı yanaşma meyilinin xeyli artmasına səbəb olmuşdur. Təbiidir ki, bunun başlıca səbəblərindən biri də yeni təlim texnologiyalarının mövcudluğu və onlardan istifadəyə marağın güclənməsidir.

Redaktoru olduğum "Azərbaycan dili və ədəbiyyatı tədrisi" jurnalının redaksiyasına tez-tez istedadlı müəllimlər gəlir, respublika müsabiqələrində öncül yer tutmaqda mühüm rol oynayan məqalələr gətirirlər. Əlbəttə, jurnalımızın bu cür praktik yazılara ehtiyacı var və ona görə də onların dərcinə dərhal xeyir-dua veririk.

Azərbaycan Respublikası Prezidentinin sərəncamı ilə 2010-2011-ci tədris ilində keçirilmiş "Ən yaxşı müəllim" müsabiqəsinin qaliblərindən biri olan və beş min manat pul mükafatına layiq görülən Şəhla Mirzəyeva iki ildir jurnalımızda fəal müəlliflik edir. Bu müddətdə onun "Tədris materiallarının möhkəmləndirilməsi prosesində interaktiv təlim metodlarından istifadə", "Bədii üslubda obrazlılığın leksik səviyyədə təzahürlərinin öyrədilməsi", "Düzəltmə sifətlərin öyrədilməsində yeni texnologiyaların rolu", "Epik əsərlərin tədrisində yeni texnologiyalardan istifadə" adlı məqalələri işıq üzü görmüşdür. "Azərbaycan müəllimi", "Bakı təhsili" qəzetlərinin səhifələrində də onun yazılarına vaxtaşırı yer verilir. Şəhla Mirzəyeva "Azərbaycan dili və ədəbiyyatının tədrisində yeni təlim texnologiyalarından istifadə" adlı kitabın da müəllifidir.

Bakı şəhərindəki 30 nömrəli orta məktəbin müəllimi olan Şəhla Mirzəyevanın istedadının üzə çıxarılmasında Bakı Pedaqoji Kadrların İxtisasartırma və Yenidənhazırlanma İnstitutunun müəllimi, tanınmış metodist Esmira Cəfərovanın xidməti danılmazdır. O, bizə Şövkət Aslanova, Həcər Bəşirova, Sevda Mehdiyeva kimi yaradıcı müəllimləri də təqdim etmişdir ki, bunlar artıq öz yazıları ilə həmkarları arasında tanınır, müxtəlif müsabiqələrdə fəal iştirak edirlər.

Prezident mükafatçısı Şəhla Mirzəyeva cəmi 17 ildir müəllimlik peşəsi ilə məşğuldur. Onun gələcəyi hələ qabaqdadır. Bir niyyəti də müəllimliklə yanaşı, elm yollarında addımlamaqdır. Onu yüksək mükafat münasibətilə ürəkdən təbrik edir, bütün niyyətlərinə bu cür şərəflə çatmasını arzulayırıq.

Məhəmməd BAHARLI

Azərbaycan müəllimi.- 2011.- 30 sentyabr.- S.6.